Унгарскиот министер за надворешни работи, Петер Сијарто, денеска изјави дека актуелната влада на Унгарија нема да дозволи Украина да стане членка на Европската Унија.
Ова го изјави коментирајќи го новиот извештај на Европската комисија за проширувањето на ЕУ и намерата на Брисел да почне преговори со Киев за членство до крајот на 2025 година.
– Унгарскиот народ јасно стави до знаење дека не сака Украина да биде членка на Европската Унија. А бидејќи прашањето за проширувањето на ЕУ бара консензус од сите земји-членки, а Унгарија и унгарскиот народ јасно ставија до знаење дека не го поддржуваат членството на Украина во ЕУ, Украина нема да стане членка на Европската Унија, се наведува во соопштението на Сијарто.
Претходно, шефицата на дипломатијата на ЕУ, Каја Калас, изјави дека Албанија, Молдавија, Украина и Црна Гора би можеле да се приклучат на Европската Унија до 2030 година.
