„Ако добро се погледне извештајот, пораката од него е јасна: не постои напредок во ниту една област. Дури и таму каде што има технички активности, нема никакви резултати. Не само што тапкаме во место, туку се враќаме назад”, рече претседателот на Социјалдемократскиот сојуз на Македонија, д-р Венко Филипче, на денешната прес-конференција посветена на Извештајот за напредокот на Македонија за 2025 година, кој вчера го објави Европската комисија.
Филипче посочи дека извештај на Европската комисијата претставува јасен сигнал дека државата под власта на ВМРО-ДПМНЕ е во целосен застој и дека европскиот пат е доведен во прашање.
„За жал, овој извештај потврди дека државата е во целосен застој, реформите се блокирани, институциите се парализирани, а европскиот пат е сведен на празна реторика без никаква реална содржина”, нагласи д-р Филипче.
Тој потсети дека Македонија и Албанија пред две години чекореа заедно на европскиот пат, но денес разликите се драстични и за разлика од Македонија, Албанија направи значителен напредок во преговорите со ЕУ.
„Чекоревме паралелно со Албанија, еве ја гледаме сега Албанија како со крупни чекори оди напред, какви се предвидувањата. За жал, ние освен што стагнираме во неколку области, имаме и назадување”, изјави лидерот на СДСМ, д-р Филипче.
Филипче на прес-конференцијата порача дека Владата на ВМРО-ДПМНЕ го загрозува европскиот пат на државата и ја враќа Македонија години наназад, наместо да ја движи напред кон европските стандарди, вредности и развој.
