Контроверзиите околу изборот за Мис Универзум 2025 продолжуваат и по финалето одржано на 21 ноември во Банкок, каде Мексиканката Фатима Бош беше крунисана со титулата. Само неколку часа по прогласувањето на победничката, една од судијките јавно го спори интегритетот на процесот на гласање, пренесува People.
Оставки и обвинувања за „нетранспарентност“
Натали Глебова, поранешна Мис Универзум 2005, беше назначена за судијка во последен момент, откако судијата Омар Харфуш поднесе оставка. Харфуш тврдел дека му било одземено влијанието врз изборниот одбор и дека постоел „импровизиран жири“ кој без негово знаење однапред ги одбрало 30 финалистки од вкупно 136 натпреварувачки.
Набргу по финалето, оставка поднеле уште двајца членови на жирито: поранешниот фудбалер Клод Макелеле и претседателката на одборот, принцезата Камила ди Борбоне деле Дује Сицилие.
„Ова е мојата победничка“ – јавната порака на Глебова
Глебова на Инстаграм објави фотографија од Мис Тајланд, Праванир Синг, која заврши како прва придружничка, со коментар: „Моја победничка!“
Таа објасни дека гласала независно, но потсети дека во нејзиното време постоеле построги механизми за осигурување на легитимноста, вклучувајќи ревизор кој на сцена носел запечатени резултати.
„Би сакала тоа да се врати. До тогаш, не гледам да продолжам како судијка“, напиша Глебова.
Можен судир на интереси
Случајот добива дополнителна тежина поради тоа што Глебова е професионален тренер за натпреварувачки подготовки и ја менторирала една од овогодишните кандидатки – Мис Канада, Џејми Ванденберг. Таа е вброена меѓу топ 30 финалистки, а на официјалните профили на Глебова се појавија фотографии со натпреварувачката зад сцената.
Иако од организацијата не дадоа коментар, критичарите укажуваат дека ваквата ситуација отвора прашања за можен судир на интереси.
Кој е Натали Глебова?
Глебова е родена во Русија, а како тинејџерка се преселила во Канада. Светската јавност ја запозна во 2005 година, кога ја освои титулата Мис Универзум – исто така во Банкок. По кариерата како модел и јавен говорник, таа се посвети на холистички тренинг и личен развој и денес работи како life-coach и авторка на книги.
Како изгледаше финалето?
Финалната вечер започна со избор на топ 30, па топ 12, по што следеше избор на топ 5, каде влегоа фаворитките според прогнозите:
Мексико, Тајланд, Филипини, Венецуела и Обала на Слоновата Коска.
Победничката титула ѝ припадна на Фатима Бош, која веќе беше во центарот на вниманието по претходниот конфликт со извршниот директор на организацијата – настан што предизвика дел од кандидатките да го напуштат настанот.
Контроверзиите продолжуваат
Со јавните забелешки на Глебова, оставките во жирито и обвинувањата за нетранспарентен изборен процес, овогодишниот избор за Мис Универзум останува под силен притисок. Организаторите засега немаат најавено формална истрага или дополнително објаснување за околностите околу гласањето.
