Палестинската претставничка Надиен Ајуб – која годинава ја испиша историјата како прва учесничка од својата земја на Мис Универзум 2025 – јавно излезе со тврдења за можни манипулации во дел од гласањето преку официјалната апликација. Во видео објавено на социјалните мрежи, Ајуб посочи „сомнителен“ пораст од над 20.000 гласови за само две минути во категоријата „Most Beautiful People“, што, според неа, е „неизводливо без внатрешна интервенција“.
View this post on Instagram
Сомнителен пораст на гласови во последните минути
Категоријата за „Најубави лица“ останала отворена и по затворањето на сите други категории во апликацијата, иако победниците во преостанатите сегменти веќе биле прогласени.
„Водев со убедливо водство, но околу половина час пред затворањето на гласањето се случи неочекуван пресврт,“ вели Ајуб. „Во рок од две минути, другата натпреварувачка доби повеќе од 20.000 гласови. Тоа е практично невозможно без масовна координација или интерна акција.“
Иако таа не наведе име, визуелните податоци што кружат на интернет укажуваат дека станува збор за претставничката на Танзанија.
„Ова не е жалба за награда – туку за праведност“
Палестинската убавица потенцира дека не зборува од разочараност што не ја добила наградата, туку од чувство на неправда и недоследност во процесот на гласање.
„Не станува збор за наградата. Јас веќе ја добив најголемата – честта да бидам Мис Палестина и глас на мојот народ,“ истакна таа. „Но кога нешто не изгледа исправно, мора да се проговори.“
Ајуб повтори дека не го доведува во прашање судиското гласање или конечниот исход на Мис Универзум, туку исклучиво апликацискиот систем – единствен сегмент кој останал активен и неконзистентно управуван.
View this post on Instagram
Организацијата Мис Универзум молчи
Од организацијата Мис Универзум, до моментот на објавување на текстот, нема официјално објаснување за тоа како се обработуваат гласовите во апликацијата, ниту пак зошто само една категорија останала отворена, иако натпреварот бил завршен, пишува Index.hr.
„Како Палестинка, ќе се борам за она што е правилно“
Во завршницата од нејзиниот јавен настап, Ајуб испрати порака дека нејзиниот ангажман не е личен, туку принципиелен.
„Јас веќе се чувствувам како победничка,“ рече таа. „Но кога нешто изгледа погрешно, тогаш е време да се реагира. Како Палестинка, секогаш ќе се залагам за праведност – било да се работи за мене или за други.“
Прочитајте и…
Судијка на изборот за Мис Универзум ја доведе во прашање легитимноста на резултатите
