James Cameron упати остри критики кон Оскарите, оценувајќи дека научнофантастичните филмови со години се потценети од гласачите, и покрај нивните уметнички и технички достигнувања.
Во интервју за филмскиот новинар Barry Hertz од канадскиот весник The Globe and Mail, оскаровецот изјави дека Академијата за филмски уметности и науки речиси никогаш не му се приоритет кога развива, снима или промовира филмови — особено кога станува збор за неговите научнофантастичните проекти, вклучително и франшизата Avatar.
„Не размислувам многу за Оскарите,“ изјави Cameron. „Намерно не размислувам за тоа во оваа фаза. Не се обидувам да направам филм што ќе ѝ се допадне на нивната сензибилност… тие обично не ги наградуваат филмовите како Avatar или научнофантастичните филмови воопшто. Научната фантастика речиси никогаш не е соодветно признаена.“
Како пример, Cameron го посочи, според него, еден од најголемите пропусти во поновата историја на Оскарите — двојното игнорирање на режисерот Denis Villeneuve за филмовите Dune и Dune: Part Two. И покрај силниот критички прием, Villeneuve не беше номиниран за најдобра режија ниту за еден од двата филма.
„Denis Villeneuve ги направи овие два величествени филма Dune, а очигледно тие сами се режирале, бидејќи тој воопшто не беше разгледуван како режисер — дури ни од Здружението на режисери,“ изјави Cameron. „Добро, можете да ја играте играта со наградите, или можете да ја играте играта што јас сакам да ја играм — да правам филмови што луѓето навистина одат да ги гледаат. Жал ми е!“
Иако денес ги критикува Оскарите, Cameron и самиот има исклучително силна историја со академијата. Неговиот филм Titanic доби 14 номинации и освои 11 Оскари, вклучително и за најдобар филм и најдобра режија. Со тоа, Titanic е изедначен со All About Eve и La La Land како најноминиран филм во историјата, а со Ben-Hur и The Lord of the Rings: The Return of the King го дели рекордот за најмногу освоени Оскари.
Редакција Фронтлајн
