Венецуелскиот претседател Николас Мадуро се наоѓа во притвор во Њујорк, откако беше заробен за време на американска воена операција во Венецуела во саботата, јавува BBC. Мадуро и неговата сопруга, првата дама Силија Флорес, биле однесени од главниот град Каракас и префрлени во Metropolitan Detention Center во Бруклин, каде треба да се соочат со обвиненија поврзани со трговија на дрога.
Во видео што го објави CNN, Мадуро во лисици придружуван од агенти на DEA, во Регионалната дивизија на DEA со надлежност за државата Њујорк.
Мадуро и претходно ги негираше обвинувањата дека е лидер на нарко-картел, тврдејќи дека станува збор за политички мотивиран прогон. Сепак, американските власти со години го поврзуваат венецуелскиот претседател со наводни криминални мрежи.
По операцијата, Венецуела прогласи вонредна состојба и остро ја осуди акцијата, нарекувајќи ја „воена агресија“ и директно нарушување на државниот суверенитет. Владата во Каракас најави дека ќе преземе дипломатски и политички чекори како одговор на американската интервенција.
Американскиот претседател Доналд Трамп изјави дека САД ќе ја „водат“ Венецуела „додека не се создадат услови за безбеден, соодветен и внимателен транзициски процес“. Тој додаде дека американски нафтени компании би можеле да помогнат во обновата на, како што ја нарече, „скршената инфраструктура“ на земјата и истовремено „да почнат да создаваат приходи за Венецуела“.
Сепак, како што анализира дописникот на BBC Том Бејтмен, ваквите изјави отвораат сериозни прашања за вистинските намери на Вашингтон. Според него, дел од критичарите сметаат дека реториката на Трамп сугерира дека приоритет не е демократска транзиција или праведен политички исход, туку економски интереси поврзани со венецуелските нафтени ресурси.
Развојот на настаните се следи со големо внимание од меѓународната заедница, со оглед на тоа што станува збор за потег без преседан во современите односи меѓу САД и Латинска Америка.
Редакција Фронтлајн
