Автопатот „Гоце Делчев“ на делницата Штип – Миладиновци е во исклучително опасна состојба, јавува читателка на Фронтлајн која утрово поминала по трасата.
Според нејзиното сведоштво, снег паѓа уште од околу четири часот наутро, а патот е подмрзнат и разгазен исклучиво од возила, без навремено фрлање сол или песок. Ситуацијата е особено критична на делот кај Свети Николе, каде коловозот е лизгав и небезбеден за сообраќај, што се гледа и од фотографиите што ни ги испрати.
Кај Алакинци (втората патарина), според читателката, има фрлено минимална количина песок и тоа само на една лента и во една насока – Штип кон Скопје, бидејќи се работи за угорница. Во спротивната насока, Скопје – Штип, која е удолница и уште поопасна при вакви услови, воопшто нема фрлано песок.
По втората патарина, на неколку места има траги дека е фрлан песок, но од Коњари до Миладиновци состојбата повторно е алармантна. Патот е подмрзнат, камиони и автомобили се лизгаат, а дел од тешките возила се принудени да застануваат на сред коловоз, што дополнително го отежнува и загрозува сообраќајот.
„Не знам дали снемале песок или нешто не функционира, но ваква негрижа ретко се гледа. Сѐ на сѐ – тешко и опасно се вози по автопат“, наведува читателката.
Таа додава дека делницата од Штип до Алакинци, која е речиси половина од автопатот, е сама по себе ризична поради силните ветришта и отворениот терен, а без навремено фрлање сол и песок, постои сериозен ризик од навеи, дополнително подмрзнување и целосно нефункционален пат сѐ додека снегот природно не се стопи.
„За останатите патишта низ земјава не сакам ни да помислам каква е состојбата“, вели таа, со иронија додавајќи:
„Но, што би рекол премиерот – ајде да зборуваме за убави работи.“
Сообраќајот на останатите државни патишта не е ништо подобар.
Како што соопштија утрово ЈП Македонијапат и АМСМ сообраќајот се одвива по претежно влажни коловози. Снег паѓа и во западниот дел од државата и има забрани за тешки товарни возила на планинските превои Ѓавато, Пресека, крак Маврово – Дебар и Струга – ГП Ќафасан.
Ј. Ѓ.
