Приватна гласовна порака што актерката Блејк Лајвли му ја испратила на режисерот и колега Џастин Балдони за време на снимањето на филмот „It Ends With Us“ беше јавно објавена како дел од судските материјали во нивниот тековен правен спор.
Пораката, испратена во февруари 2023 година, според американските медиуми, фрла ново светло врз односите меѓу двајцата во периодот пред ескалацијата на конфликтот.
Во гласовната порака, Лајвли му се обраќа на Балдони со пријателски тон, објаснувајќи дека сака да го информира за нејзината загриженост околу распоредот за снимање на филмот, во период кога истовремено работела и на друг проект, кратко по раѓањето на нејзиното најмладо дете.
„Ти зборувам повеќе како пријател“, вели Лајвли во пораката, објаснувајќи дека чувствува голем стрес поради напорниот распоред, недостатокот на сон и потребата да биде во најдобра физичка форма за снимањето.
Таа посочува дека не бара промена на распоредот, но дека би ѝ значело доколку постои можност снимањето да започне малку порано или да има кратка пауза меѓу проектите. Во пораката споменува и дека нејзиниот сопруг, актерот Рајан Рејнолдс, ја охрабрил да биде отворена и искрена во комуникацијата.
Лајвли нагласува дека е свесна оти нејзините лични грижи „не се проблем на Балдони“, но сепак сакала да ја сподели ситуацијата, додавајќи дека месец дена разделеност од семејството претставувал дополнителен товар.
Снимањето на филмот „It Ends With Us“ започна во мај 2023 година, по што беше прекинато и одложено поради штрајкот на сценаристите, а продолжи во јануари 2024 година.
Откако филмот беше премиерно прикажан во август 2024 година, меѓу Лајвли и Балдони се појавија шпекулации за нарушени односи, а двајцата не се појавуваа заедно на промотивните настани.
Во декември истата година, Лајвли поднесе тужба против Балдони за сексуално вознемирување, што тој категорично го негираше. Балдони подоцна поднесе контратужба, која беше отфрлена. Судскиот процес меѓу двете страни продолжува, а почетокот на судењето е закажан за 18 мај 2026 година.
Во последните месеци, случајот привлекува големо медиумско внимание поради јавно објавени пораки, електронска преписка и сведоштва што вклучуваат и други познати личности од Холивуд.
Редакција Фронтлајн
