154.408 работници во Македонија примаат плата под 30.000 денари и живеат под прагот на сиромаштија, соопшти Сојузот на синдикатите на Македонија (ССМ), повикувајќи ги работниците да се приклучат на протестот за зголемување на минималната плата.
Според ССМ, податоците се базираат на информации од Управата за јавни приходи.
„154.408 работници имаат плата под 30.000 денари и имаат огромна причина да протестираат за зголемување на минималната плата“, се наведува во соопштението.
Една третина од работниците под прагот на сиромаштија
Од ССМ наведуваат дека во Македонија има вкупно 503.031 работник кои примаат плата.
„Прагот на сиромаштија во Македонија изнесува 31.200 денари, а една третина од работниците во Македонија живеат со примања под прагот на сиромаштија, односно работат, а се сиромашни“, се наведува во соопштението.
Синдикатот оценува дека зголемувањето на минималната плата директно би влијаело врз платите на овие работници.
„Борбата на Сојузот на синдикатите на Македонија за зголемување на минималната плата значи директно зголемување на платите на овие 154.408 работници“, наведува ССМ.
Повик за протест на 14 март
Сојузот на синдикатите на Македонија ги повика работниците да се приклучат на протестот најавен за 14 март во Скопје.
„Ги повикуваме сите работници, нивните најблиски, ги повикуваме и овие 154.408 работници да се придружат на протестот кој ќе започне на 14 март, во 12.05 часот, од пред Работничкиот дом во Скопје“, се наведува во соопштението.
Според најавата, протестот ќе продолжи пред Собранието, Стопанската комора и Владата.
„Работниците да се борат за својата плата“
Од ССМ порачуваат дека протестот има за цел зголемување на работничките плати.
„ССМ излегува да се бори за зголемување на работничките плати, а работниците треба да излезат да се борат за својата плата затоа што зголемувањето на минималната плата значи зголемување на сите останати плати“, се наведува во соопштението.
