„Стратегија без култура, само алиби за неспособноста на власта“, реагира Комисијата за култура на СДСМ по најавата на министерот за култура Зоран Љутков за нацрт-Стратегијата за развој на културата 2026–2030.
Во соопштението се наведува дека документот што го презентирало Министерството содржи „големи зборови на хартија“, додека, како што оценуваат од партијата, состојбата во културата во земјата е сериозно влошена.
„Министерот Зоран Љутков се пофали со нацрт-Стратегија за развој на културата 2026–2030. На хартија, големи зборови, а во реалноста, културата во Македонија никогаш не била во полоша состојба“, се наведува во реакцијата.
СДСМ: Системот во културата е урнат
Од Комисијата за култура на СДСМ тврдат дека Владата предводена од Христијан Мицкоски и ВМРО-ДПМНЕ, наместо да го развива секторот, го нарушила неговото функционирање.
„Владата на Христијан Мицкоски и ВМРО-ДПМНЕ прво го урна системот во културата, а сега се обидува со стратегија да ја прикрие сопствената неспособност“, се вели во соопштението.
Според нив, неколку клучни проблеми ја одредуваат моменталната состојба во културата: намалување на буџетот за култура, кој, како што наведуваат, е меѓу најниските во последните години, недостиг од стабилно финансирање и развојни програми за националните институции, запоставување на културното наследство и влошена положба на уметниците и културните работници.
Критики за новата стратегија
Од СДСМ оценуваат дека наместо конкретни политики, новата стратегија нуди, како што велат, „бирократски документ со општи формулации“.
„Наместо реални политики, власта нуди бирократски документ со општи формулации, без конкретни механизми, без финансиска рамка и без јасна визија“, се наведува во реакцијата.
Партијата потсетува дека, според нив, во периодот кога СДСМ ја предводела Владата биле преземени чекори за развој на културниот сектор.
„Да потсетиме: токму Владата предводена од СДСМ во изминатите години ја донесе првата современа стратегија за култура, го отвори секторот кон европските програми, го зголеми буџетот за култура и започна сериозни процеси на заштита на културното наследство“, се вели во соопштението.
Предлог-мерки од СДСМ
Во реакцијата се додава дека, според нив, во моментов се случува спротивен процес – централизирање на одлуките, партизација на институциите и стагнација на културниот систем.
„Културата не се развива со PR-соопштенија и протоколарни седници. Културата се развива со визија, инвестиции и почит кон уметниците и културните работници“, наведуваат од Комисијата за култура на СДСМ.
Од партијата посочуваат дека ќе продолжат да предлагаат конкретни мерки, меѓу кои стабилен и транспарентен буџет за култура, фонд за заштита на културното наследство, рамномерен културен развој низ државата и подобри услови за работа на уметниците.
„Културата не смее да биде жртва на неспособноста на оваа власт“, се наведува во соопштението.
