„Ниту една држава не може да просперира со сиромашни работници“ – ова е една од клучните пораки што беа упатени на денешната средба меѓу претставници на Меѓународната конфедерација на синдикати (ITUC), Сојузот на синдикати на Македонија (ССМ) и министерот за економија и труд, Бесар Дурмиши.
На средбата учествуваа претседателот на ССМ, Слободан Трендафилов, генералниот секретар на ITUC, Лук Триангл, како и претставници на Паневропскиот регионален комитет, при што фокусот беше ставен на состојбата со работничките права, платите и социјалниот дијалог во државата.
Барања за минимална плата од 600 евра
На состанокот беа разгледани барањата на ССМ за зголемување на минималната плата на 600 евра, како и за покачување на сите останати плати за најмалку 6.000 денари.
Од ССМ посочија дека овие барања се темелат на анализи базирани на податоци од институции како Државниот завод за статистика, Народната банка, Управата за јавни приходи и меѓународни организации, како и на синдикалната минимална кошница.
Загриженост за состојбата со работничките права
Генералниот секретар на ITUC, Лук Триангл, изрази сериозна загриженост за состојбата со работничките права во Македонија, оценувајќи дека наместо подобрување, ситуацијата се влошува.
Тој посочи дека земјата има лоша оценка во Глобалниот индекс за работнички права, а предупреди и на постоење практики спротивни на Конвенциите 87 и 98 на Меѓународната организација на трудот, кои се однесуваат на слободата на здружување и колективното договарање.
Критики за социјалниот дијалог
На средбата беше нагласено дека социјалниот дијалог во државата е нарушен, а Економско-социјалниот совет не функционира како суштински механизам за креирање политики.
Од ITUC порачаа дека трипартитноста мора да се почитува, а дијалогот меѓу Владата, работодавачите и синдикатите треба да биде активен и реален, а не формален.
Проблеми со синдикалното организирање и притисоци
ССМ укажа на низа предизвици, меѓу кои обиди за мешање во синдикалните организации, притисоци врз синдикалните претставници и непочитување на колективните договори.
Дополнително, беше посочено дека синдикалното организирање е особено отежнато во слободните економски зони, каде што работниците имаат ограничени можности за колективно преговарање.
Порака за достоинствен живот
Од ITUC беше испратена јасна порака дека минималната плата треба да обезбеди достоинствен живот, а не преживување.
Беше нагласено дека Владата и работодавачите мора да се фокусираат на подобрување на животниот стандард на работниците, бидејќи економскиот развој не е одржлив без социјална стабилност.
Поддршка за ССМ и најавен меѓународен мониторинг
Генералниот секретар на ITUC изрази поддршка за ССМ и за синдикалното движење во земјава, при што осуди кампањи за дискредитација на синдикалните лидери.
Беше најавено дека ITUC ќе продолжи да ги следи состојбите во Македонија, а напредокот ќе биде разгледуван на годишната конференција на Меѓународната организација на трудот во Женева.
