„Српска ПР агенција ги штанца лажните соопштенија и прес-конференции на СДС“, изјави Валентин Манасиевски, член на Централниот комитет на ВМРО-ДПМНЕ.
Тој обвини дека Зоран Башановиќ, поранешен советник на Зоран Заев, го води ПР тимот на СДСМ и Венко Филипче, додавајќи дека зад комуникацијата стојат лица поврзани со Србија.
Според Манасиевски, Венко Филипче пред неколку месеци, по препорака на Зоран Заев, остварил средба во Ниш со Милјан Счекич, кој наводно е ангажиран за креирање на соопштенија и прес-конференции.
Како што наведе, станува збор за лице поврзано со српската ПР агенција „Ај медија“ (Eye Media), кое преку Башановиќ било предложено да работи за СДСМ.
Манасиевски тврди дека Башановиќ и Счекич се наоѓаат во Скопје, каде од хотел го координираат, како што рече, „центарот за лаги и манипулации“ на СДСМ.
Тој додаде дека ова, според нив, ја објаснува содржината и стилот на соопштенијата на СДСМ, како и употребата на, како што рече, „српски фрази и споредби“.
Од ВМРО-ДПМНЕ најавуваат дека во наредните денови ќе изнесат дополнителни информации на прес-конференции поврзани со овие тврдења.
На обвинувањата реагираа од СДСМ, од каде велат дека станува збор за обид за дефокус од реалните проблеми.
„Платформата на ВМРО за урнување на СДСМ не помина, па сега Башановиќ?! Леб нема, ама има игри…“, се наведува во реакцијата.
Од СДСМ оценуваат дека, како што велат, дефокусот повеќе не функционира кај граѓаните.
„Дефокусот не го полни фрижидерот. Дефокусот не ги крева платите, не ги намалува цените на нафтата, не дава подобри услови за образование и здравство“, велат од партијата.
Во реакцијата се додава дека дефокусот, според нив, не може да ги прикрие случаите поврзани со корупција и апсења на функционери.
„Дефокусот не може да ги среди криминалот и корупцијата, ниту да го избрише апсењето на директорот од ВМРО за мито во скандалот со ИПАРД 3“, наведуваат од СДСМ.
Од СДСМ упатија и серија политички обвинувања кон ВМРО-ДПМНЕ, тврдејќи дека партијата, како што велат, „ги излажала граѓаните“ за клучни прашања поврзани со државните политики и меѓународната позиција.
„Единствените предавници сте вие! ВМРО-ОКГ!“, се наведува во реакцијата, каде се додава и дека, според нив, ЕУ е национален интерес.
Во соопштението се спомнуваат и економски теми, како цените, буџетот и животниот стандард, како и обвинувања за контрола врз медиумите и тендери.
Реакцијата од СДСМ завршува со порака дека, како што велат, „дефокусот повеќе не може да ги покрие сите лаги“, додавајќи дека нема да дозволат, според нив, „Македонија да стане Венецуела и Колумбија“.
Политичката размена на обвинувања меѓу двете најголеми партии продолжува, со најави за нови прес-конференции и реакции во наредниот период.
Ј. Ѓ.
