Иранскиот претседател Масуд Пезешкијан им порача на земјите од Заливот да не дозволат нивната територија да биде користена за воени дејства против Иран, објави Индекс.хр, повикувајќи се на порака што тој ја објавил на платформата X.
„Ако сакате развој и безбедност, не дозволувајте нашите непријатели да водат војна од вашите земји“, напиша Пезешкијан во пораката упатена до, како што навел, „земјите од регионот“.
Според истиот извештај, иранскиот претседател се заканил со силна одмазда доколку бидат нападнати иранска инфраструктура или економски центри. Пораката доаѓа во услови на нова ескалација на тензиите во регионот.
Ирански извори, како што пренесува „Индекс“, тврдат дека израелските и американските сили претходно ги прошириле воздушните напади врз челичарници, како и врз објекти од одбранбената и енергетската инфраструктура во неколку ирански провинции.
Во текстот се наведува и дека од почетокот на војната на 28 февруари, Иран изведувал напади врз цели во повеќе држави од Заливот каде што има американски воени бази.
Во меѓувреме, израелската армија соопштила дека завршила уште еден бран напади врз цели во Техеран поврзани со иранското раководство. Истовремено, според извештаите, имало и нови ирански ракетни напади врз Израел, а сирени се огласиле во неколку области на југот на земјата.
