Максималната малопродажна цена на дизел горивата од ноќеска на полноќ се зголемува за 2,5 до 3 денари за литар, а цената на бензинот ЕУРОСУПЕР БС-95 се намалува за половина денар, одлучи денеска Регулаторната комисија за енергетика (РКЕ). Со одлуката се врши зголемување на малопродажните цени на нафтените деривати во просек за 1,41 отсто.
Дизелот поскапува и од полноќ ќе чини 98 ден./литар. Цената на бензинот ЕУРОСУПЕР БС-95 ќе изнесува 83,5 ден./литар, додека цената на ЕУРОСУПЕР БС-98 останува непроменета и изнесува 85,5 ден./литар.
Екстра лесното масло за горење (ЕЛ-1) од полноќ ќе се продава по цена од 95,5 ден./литар, додека мазутот М1 НС ќе се продава по цена од 51,311 ден./килограм.
Претседателот на Владата, Христијан Мицкоски, пак, денеска најави намалување на акцизите за горивата, мерка која, како што истакна премиееот, произлегува од вчерашната владина одлука со цел да се заштити стандардот на граѓаните и стопанството. Според најавите од премиерот Мицкоски, Регулаторната комисија за енергетика денеска треба да ги намали акцизите за дизелот за 4 денари по литар, додека за бензините намалувањето ќе изнесува 2 денари.
Премиерот истакна дека оваа одлука е резултат на координирани напори, вклучително и директни преговори со раководството на „ОКТА“ и „Хеленик Петролеум“ во Атина и Скопје. Со овие разговори е обезбеден дополнителен период од еден месец за намалување на цените за 3 денари кај дизелот и 2 денари кај безоловниот бензин. Крајниот ефект од овие мерки треба да донесе поевтин бензин за потрошувачите, додека кај дизел горивото се очекува цената да остане стабилна и да нема поскапувања на бензинските пумпи, и покрај тешката енергетска состојба во светот.
Во однос на енергетската стабилност, Мицкоски упати смирувачки пораки дека државата располага со доволни количини на гориво и дека нема простор за страв од недостиг. Тој посочи дека потрошувачката е во пораст, со зголемување од милион и пол на два милиони литри дневно, особено во пограничните места, но дека системот е подготвен да одговори на притисокот.
Како дополнителна заштитна мерка, Владата ја продолжи и одлуката за намалување на ДДВ-то за горивата од 18 на 10 проценти. Овој пакет мерки, според премиерот, има единствена цел – заштита на куповната моќ на граѓаните и поддршка на бизнис секторот во услови на глобални пазарни предизвици.
Премиерот Мицкоски ја искористи можноста да испрати и политичка порака, нагласувајќи ја промената во меѓународната позиција на државата. Тој истакна дека Македонија повеќе не е земја која „коленичи и моли“, туку држава која рефлектира стабилност и зрелост во регионот, помагајќи им на другите кога е потребно.
Владата внимателно ја следи состојбата на светските берзи, каде од утрово се забележува постепен пад на цените на нафтените деривати. Сепак, конечните одлуки ќе се носат врз основа на неделните движења на берзата, за да се обезбедат реални и одржливи цени за дизел горивото и безоловниот бензин во наредниот период. Со овој одговорен пристап, Владата најавува дека ќе продолжи да биде активен фактор во одржувањето на стабилноста на домашниот пазар.
