Регулаторната комисија за енергетика, водни услуги и услуги за управување со комунален отпад (РКЕ) на денешната седница донесе одлука за намалување на малопродажните цени на нафтените деривати во просек за 2,73 отсто. Новите, пониски цени стапуваат на сила од ноќеска на полноќ и ќе важат за сите бензински станици во државата.
Најголемо намалување има кај дизел горивото, чија цена се намалува за 2,5 денари по литар. Истовремено, малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,5 денар по литар во споредба со претходно утврдените вредности.
Согласно најновата одлука на РКЕ, литар ЕУРОСУПЕР БС-95 ќе се продава по цена од 82,00 денари, додека новата цена на ЕУРОСУПЕР БС-98 ќе изнесува 84,00 денари по литар. Дизел горивото ЕУРОДИЗЕЛ БС (Д-Е V) од полноќ ќе чини 95,50 денари за литар, а цената на Екстра лесното масло за домаќинство (ЕЛ-1) ќе изнесува 96,50 денари. Мазутот М-1 НС исто така бележи промена и ќе се продава по цена од 49,227 денари за килограм.
Од Регулаторната комисија појаснуваат дека овие цени се утврдени како највисоки малопродажни граници, што значи дека трговците на големо и на мало можат да формираат цени кои се и пониски од овие износи. Во цените се веќе пресметани сите давачки, вклучително и данокот на додадена вредност, како и транспортните и оперативните трошоци на складовите и трговците.
