Комисијата за култура на СДСМ преку соопштение упати остри критики до министерот Зоран Љутков, обвинувајќи го дека проектите на археолошкиот локалитет Стоби, кои ги претставува како сопствени успеси, всушност се обезбедени и финансирани во време на претходната власт. Од опозициската партија велат дека министерот се занимава со дневна ПР-пропаганда наместо со реална културна политика.
Според СДСМ, клучните активности во Стоби не се резултат на новата програма на Министерството, туку се плод на меѓународни партнерства воспоставени пред неколку години.
Од Комисијата за култура ги наведуваат следните факти за тековните активности:
Конзервацијата на Теодосијанската палата е проект поддржан од фондот „Џ.М. Каплан“ во соработка со Фондацијата „Балканско наследство“, започнат уште во 2022 година.
Проектот „Еуропос Платино Стоби“, финансиран преку ИПА програмата за прекугранична соработка со Грција, е започнат во 2021 година.
Адаптацијата на Старата железничка станица во Центар за посетители е проект кој бил планиран и финансиски обезбеден во време на владеењето на СДСМ.
„Овие факти јасно покажуваат дека станува збор за континуитет на политики и инвестиции воспоставени во време на СДСМ, а не за нова визија на актуелното раководство. Денес гледаме класичен пример на китење со туѓи перја“, се вели во соопштението.
Опозицијата го обвинува министерот Љутков дека додека „позира на археолошки локалитети“, истовремено врши директен удар врз Колективниот договор за култура. Од партијата посочуваат дека министерот демонстрира отсуство на емпатија во моменти кога вработените излегуваат на протести за зачувување на своите стекнати права.
„Во момент кога вработените во културата излегуваат на протести, кога јавно предупредуваат дека им се одземаат стекнати права, министерот демонстрира целосно отсуство на емпатија. Наместо дијалог и решенија имаме молк и ПР-тури“, обвинуваат од СДСМ.
Комисијата за култура на СДСМ заклучува дека културното наследство не се брани со фотографии, туку со почит кон луѓето во секторот, и го повика министерот Љутков да престане со „политичката симулација“ и да се соочи со реалните проблеми на културните работници.
