СДСМ обвинува дека лидерот на ВМРО-ДПМНЕ, Христијан Мицкоски, ангажирал странска приватна разузнавачка компанија за активности насочени кон опозицијата, повикувајќи се на, како што наведуваат, „ист модел што веќе бил користен во други европски држави“.
Во соопштението, СДСМ тврди дека станува збор за израелската компанија „Black Cube“, за која велат дека е „позната како приватен Мосад“.
„Мицкоски ги ангажирал ‘Black Cube’ – приватниот ‘Мосад’ за следење на опозицијата“, се наведува во партиското соопштение.
Од СДСМ посочуваат дека оваа компанија претходно била ангажирана во Унгарија од страна на Виктор Орбан, како и во други политички процеси во Европа.
„Орбан уште 2018 година ги однесе ‘Black Cube’ во Унгарија и ги користеше за валкани операции против политичките противници. На последните избори во Унгарија, оваа компанија требаше да пушти провокативни снимки против Петер Маѓар, додека истовремено работеа на афера на изборите во Словенија за Јанез Јанша“, велат од СДСМ.
Партијата обвинува дека истата стратегија сега се применува и во Македонија.
„Сега истата тактика ја применуваат и во Македонија. Христијан Мицкоски и ВМРО-ОКГ се обидуваат да фабрикуваат афери против СДСМ преку странски приватни разузнавачки агенции“, стои во соопштението.
Според нив, цел на наводниот ангажман биле високи функционери на партијата.
„Мицкоски и неговата група ја ангажирале оваа компанија за да ги следи функционерите на СДСМ, особено претседателот Венко Филипче“, тврдат од СДСМ.
Во соопштението се додава и дека претставници на компанијата веќе биле во Скопје.
„Тимот на ‘Black Cube’ неодамна престојувал во Скопје и во еден ексклузивен хотел имале состанок со заштитниците на криминалната група ВМРО. На состанокот присуствувал и еден бизнисмен, многу близок до ВМРО, кој треба да го финансира ангажманот на оваа приватна израелска компанија“, наведуваат од партијата.
Од СДСМ оценуваат дека ваквите активности претставуваат, како што велат, „автократски модел на делување“.
„Ова не е случајност. Ова е класичен автократски модел: кога легалните инструменти не функционираат, се ангажираат приватни разузнавачки агенции за да се прават лажни афери и да се заплашува опозицијата“, стои во реакцијата.
Воедно, од партијата порачуваат дека нема да отстапат од своите политички позиции.
„Ние не се плашиме од приватни ‘Мосад-и’, ниту од ‘чувствата’ на Мицкоски. Ќе продолжиме да инсистираме на вистината, на независното правосудство и на европскиот пат на Македонија. Доаѓа времето на вистината, правдата и одговорноста!“, се наведува во соопштението на СДСМ.
