Проектот „ЕУ за општините“ претстави нова практична алатка наменета за локалните самоуправи во Северна Македонија – „Прирачник за спроведување на кампања за подигнување на јавната свест за данок на имот“. Оваа публикација нуди структуриран пристап за тоа како општините преку јасни пораки и соодветни канали да ги информираат граѓаните за важноста на редовното плаќање на даноците, со цел зајакнување на довербата и подобрување на локалните услуги.
Амбасадорот на Европската Унија, Михалис Рокас, во предговорот на прирачникот истакнува дека општините се клучните места каде европските политики се претвораат во конкретни подобрувања за секојдневниот живот на граѓаните. Според него, овој проект докажува дека евроинтеграцијата е партнерство изградено на конкретни резултати и соработка. Енцо Дамиани, програмски менаџер во Делегацијата на ЕУ, додава дека ефикасното управување со јавните финансии е директно поврзано со квалитетот на услугите што општините ги испорачуваат.
Поддршка за капацитетите на локалната администрација
Прирачникот е дел од поширока серија публикации на „ЕУ за општините“ наменети за надградба на административните и техничките капацитети на општините. Автори на публикацијата се Бардул Марку, Клаус Рихтер и Бојан Кордалов, а истата е достапна за бесплатно преземање на официјалните дигитални платформи на проектот. Овие алатки се дизајнирани да останат во трајно владение на локалната администрација и по завршувањето на проектните активности.
Во изминатите шест години, програмата „ЕУ за општините“ постигна мерливи резултати, вклучувајќи обука на 1.500 претставници од локалната самоуправа и поддршка за сите 81 општина во државата. Преку овој проект се реализирани бројни грантови и воспоставени се партнерства со општини од шест земји членки на ЕУ, што значително го унапреди учеството на македонските општини во меѓународните програми како Interreg.
