Уметникот Велимир Жерновски и тимот од Музејот на современата уметност – Скопје деновиве заминуваат во Венеција за да го организираат македонското претставување на престижното 61. Биенале за уметност. Тие веднаш ќе почнат со поставување на монументалната инсталација „Дали моите очи ќе бидат затворени или отворени?“, која е дел од проектот „Пиета во прекривките на ургентноста“, соопштија од Музејот на современата уметност (МСУ).
Македонскиот павилјон се наоѓа на локацијата „Спацио Кастело 77“ на влезот во Арсенале, а комесар на проектот е директорот на МСУ, Авни Ќаили. Куратори на ова претставување се Тихомир Топузовски од МСУ и Аманда Буткез од Канада. Во пресрет на заминувањето, претседателката Гордана Сиљановска-Давкова ги прими Жерновски и Топузовски, при што беше истакната важноста на македонското учество како исклучителна можност за достојно претставување на домашниот творечки потенцијал и насушната потреба од институционална поддршка на културата.
Според авторот Велимир Жерновски, учеството е голема чест и обврска бидејќи станува збор за претставување на државата. Во своето монументално дело тој ја обвиткува препознатливата Пиета со златни ургентни прекривки изработени од метализиран пластичен филм, материјал кој првенствено се произведува за вселенски мисии. Тој појаснува дека овие водоотпорни и рефлективни фолии се искористени за повторно облекување на Пиетата, со цел да се постават онтолошки прашања за опстанокот и љубовта во злокобни времиња кои најавуваат деструкција.
Кураторот Тихомир Топузовски појаснува дека концептот ја разобличува фигурацијата на Пиетата, претворајќи ја во нов спектар на облици надвор од досегашните историски значења. Топузовски потенцира дека материјалот на прекривките денес функционира како визуелен маркер на жртвите на глобалната нееднаквост, градејќи нови етички рамки за сочувство кон поединци и групи во егзил. Кураторката Аманда Буткез додава дека проектот ги поканува посетителите да размислат како се реконфигурираат односите во време на бројни итни состојби, истражувајќи ја дилемата како ургентните прекривки истовремено нѐ штитат, но и нѐ изолираат од надворешните сили.
Венециското биенале, кое има историја долга 130 години, ќе се одржи од 9 мај до 22 ноември 2026 година. Годинашната главна изложба е насловена „Во молски тоналитети“ и се реализира според визијата на кураторката Којо Куох, а ќе вклучи 110 уметници, 100 национални претставувања и 31 дополнителен настан.
