Последниот случај на брутално врсничко насилство врз девојче во Скопје е уште еден сериозен аларм дека системот кој треба да штити и превенира целосно потфрла, поради што министерот за внатрешни работи Панче Тошковски мора да сноси политичка одговорност. Членката на Извршниот одбор на СДСМ, Симона Цветаноски, истакна дека за сите пропусти, за промашената превенција и несоодветното постапување на полицијата, одговорноста е директно кај ресорниот министер, соопштија од СДСМ.
Цветаноски порача дека во последните две години насилството станало секојдневие во училиштата, домовите и на улиците, а безбедноста на децата е сериозно загрозена. Таа потсети дека само од почетокот на годинава се регистрирани три грозоморни случаи на злоупотреба на малолетници во Скопје, Гостивар и Неготино. Дополнително, таа ги посочи трагичните случаи на семејно насилство кои завршија фатално поради нереагирањето на институциите, споменувајќи ја смртта на младата Ивана за која имало дури 12 пријави во две години, убиството на Росица и нејзиниот татко во Велес, како и случајот со серискиот убиец во Старо Нагоричане кој уби пет жени додека полицијата ги игнорирала пријавите на жителите.
Во своето обраќање, Цветаноски потсети и на трагедијата во Кочани со 63 жртви, обвинувајќи го Тошковски дека ги штител полициските началници наместо да ги санкционира. Таа го отвори и скандалот со петте тони дрога кои поминале преку граница без никаква контрола, прашувајќи кој од врвот на власта, царината и полицијата ќе одговара за овој случај за кој сè уште нема одговор од МВР.
На крајот, претставничката на СДСМ заклучи дека полицијата е ставена исклучиво во функција на заштита на власта наместо на граѓаните. Таа порача дека ниту една прес-конференција нема да ја врати довербата во институциите, потенцирајќи дека министерот Тошковски покажал оти нема капацитет да ја гарантира безбедноста на граѓаните и затоа е време веднаш да си поднесе оставка.
