Пет тима од СТЕМ Академија освоија пет награди во пет различни категории на меѓународниот натпревар за СТЕМ роботика и автоматизација СТЕМАТЛОН. Натпреварот се одржа на 26 април во Атина, во силна конкуренција на над 400 тимови од осум земји.
Македонија ја претставуваа 23 ученици поделени во пет тима, при што секој тим освои по една награда со свои инженерски решенија на темата „Кога луѓето би биле единствената вештачка интелигенција“. Учениците работеа на проекти поврзани со реални предизвици од секојдневниот живот, опфаќајќи области како транспорт, производство на храна, заштита од природни непогоди и безбедност на значајни објекти. За реализација на овие проекти, тие користеа различни технологии од областа на роботиката и автоматизацијата, како и решенија базирани на вештачка интелигенција. Како посебен белег на нивното претставување, на свеченото отворање на кое сите држави се претставуваа со песна од нивната земја, македонските ученици ја избраа и ја изведоа „Ангел си ти“ од Тоше Проески.
„Особено сме горди што сите пет тима се вратија со награди во силна меѓународна конкуренција“, изјави Љубчо Јованов од СТЕМ Академија. Тој истакна дека овој успех претставува потврда дека македонските ученици можат рамноправно да се натпреваруваат со врсници од регионот и пошироко, користејќи современи инженерски пристапи и AI технологии.
Овој резултат претставува уште една потврда за континуитетот на меѓународните успеси на учениците од СТЕМ Академија, имајќи предвид дека на почетокот на април годинава тимовите на Академијата освоија прво и второ место на Глобалната олимпијада за роботски спортови во Крит, Грција. СТЕМ Академија е меѓународно акредитирана образовна организација од Скопје која работи со ученици на возраст од 5 до 16 години преку програми по роботика, автоматизација и инженерство. Од организацијата потенцираат дека резултатите од меѓународните натпревари претставуваат значаен дел од развојот на практичните СТЕМ компетенции кај младите.
