Комисијата за култура на СДСМ денеска преку соопштение обвини дека во националните установи во културата се спроведува организиран модел на страв, притисоци и реваншизам врз културните работници, системски оркестриран од власта на ДПМНЕ и ресорниот министер Зоран Љутков.
Според опозициската партија, во речиси сите институции вработените што бараат почитување на Колективниот договор и своите законски загарантирани права се изложени на притисоци, етикетирања и обиди за замолчување.
„Скандалозно е сознанието дека од установите се бараат списоци на вработени што поднесуваат тужби за непочитување на своите работнички права. Тоа е опасен обид за етикетирање, заплашување и дисциплинирање на луѓето што не молчат пред неправдата“, се наведува во соопштението.
Од Комисијата за култура на СДСМ упатија остри критики лично до министерот Зоран Љутков, квалификувајќи го неговото однесување како лицемерно. Тие потенцираат дека Љутков, кој до вчера се претставувал како борец за синдикални права и достоинство на колегите, денес е претворен во нивен најголем противник, „извршител на притисоци“ и човек кој врши пресметка со оние што бараат законска плата. СДСМ ова го нарече политичко и морално предавство на луѓето со кои министерот до вчера стоел рамо до рамо.
Дополнително, од СДСМ обвинуваат дека на седници на управни одбори на вработените не им се дозволува право на збор ниту присуство на нивни адвокат, додека институциите се бранат со ангажирани адвокати платени со народни пари, што го оценија како злоупотреба на моќта.
„Културата не смее да стане сектор на уцени, списоци и партиска послушност. Вработените во музеите, театрите, библиотеките и сите културни институции не се ничии заложници“, порачуваат од опозицијата.
СДСМ јавно застана на страната на културните работници, најавувајќи дека ќе ја разобличува секоја форма на притисок и незаконско постапување, со порака дека борбата за достоинство во културата продолжува.
