СДСМ обвинува за криминална бизнис зделка без тендер, од Владата одговараат дека станува збор за кризна набавка по двојно пониска цена од пазарната, со цел да им се помогне на граѓаните. Набавката на вода за пиење за граѓаните на Гостивар предизвика нова остра пресметка меѓу СДСМ и Владата.
СДСМ: Профит на грбот на народот со директен договор за компанијата на градоначалникот на Кавадарци
Од СДСМ преку соопштение ја обвинија Владата и премиерот Мицкоски дека преку Службата за општи и заеднички работи (СОЗР) склучиле договор во вредност од 100.000 евра за набавка на вода за пиење, и тоа со директно договарање, без јавен оглас.
Според опозицијата, постапката која ја спровел директорот на СОЗР, Ивица Томовски, резултирала со договор со компанијата „Кожувчанка“, која е во сопственост на градоначалникот на Општина Кавадарци.
„Додека граѓаните на Гостивар со недели пиеја загадена вода и илјадници луѓе се соочуваа со здравствени последици, Владата на Мицкоски склучила договор од 100.000 евра. Ништо не функционира освен бизнис зделките на тендер патриотите. Дури и во овие моменти кога народот се труе, тие тераат бизнис и профитираат на грбот на народот и на здравјето на луѓето“, велат од СДСМ.
Влада: Дрски лаги, водата се дели бесплатно, а компанијата ја дава по 12,5 денари за шише
Владата експресно и најостро ги демантираше обвинувањата од СДСМ, нарекувајќи ги комплетно измислени дезинформации и „дрски и безобразни лаги“.
Од Владата потврдуваат дека постапката со преговарање била спроведена од СОЗР за да се обезбеди бесплатна вода за граѓаните на Гостивар додека не се потврди исправноста на водоводниот систем, како и дека договорот го добила „Кожувчанка“. Сепак, тие ја демантираат позадината на договорот, посочувајќи ја цената на набавката.
„Факт е дека шише вода од 1,5 литри кое во малопродажба чини најмалку 25 денари, Владата го набавува по цена од 12,5 денари. Тоа е возможно затоа што компанијата „Кожувчанка“ учествува во набавката со сопствен придонес, со цел да им се помогне на граѓаните и институциите во услови на кризна состојба“, се вели во владината реакција.
Од Владата порачаа дека пред фактите паѓа секоја манипулација и апелираа до СДСМ „кога на ниту еден начин не помагаат, барем да престанат безобразно да лажат“.
