СКОПЈЕ, 19 август – Со настапот на Младинскиот оркестар на Западен Балкан, синоќа на Плоштадот „Скендербег“ беше заокружена програмата на годинешното културно лето во Општина Чаир. Музичкиот настан се одржа во рамките на 14-тото издание на фестивалот „Сцена на албанската сериозна музика“.
Под диригентската палка на Десар Сулејмани, младите музичари од земјите на Западен Балкан ѝ приредија на публиката посебна вечер на класична музика, со што официјално се затвори повеќемесечната програма.
Богата програма и нови културни манифестации
Почнувајќи од 1 јуни, Плоштадот „Скендербег“ и Старата скопска чаршија беа сцена на разновидна програма наменета за публика од сите возрасти. Граѓаните и посетителите имаа можност да проследат концерти со албанска, фолклорна и класична музика, театарски претстави и филмски проекции и активности наменети за деца.
Ова културно лето се одбележа и со воведувањето на два нови настани кои за првпат беа организирани, давајќи нова димензија на културниот живот во општината и градот. Беа одржани саем на албанската книга и меѓународниот музички фестивал „Чаршија“.
Визија за модерен простор и развој на туризмот
Според соопштението од општината, преку овие активности, целта беше јавните простори во Чаир да се претворат во места за средби на уметници, автори, музичари и посетители од земјата и регионот.
Од Општина Чаир истакнуваат дека оживувањето на чаршијата, подигнувањето на уметничкото ниво и збогатувањето на културната понуда се дел од нивната визија за урбана и модерна општина. Локалната самоуправа најавува дека ќе продолжи со поддршка и развој на културните програми, со цел овие манифестации да прераснат во традиција и да придонесат кон културниот и туристичкиот потенцијал на Чаир и Старата скопска чаршија.
Д. Е.
