Кривичниот совет го прифатил барањето и поднесената гаранција од Зоран Милески-Кичеец за укинување на домашниот притвор одреден до правосилност на тригодишната затворска казна во случајот „Рекет“.
– Домашниот притвор е укинат од Кривичниот совет на наше барање со гаранција од недвижности, проценети над 13 милиони денари. Укинат е пред две недели, потврди за МИА адвокатот Александар Новаковски.
Милески на почетокот на судењето во случајот „Рекет“ ја призна вината за делото – во кое се товареше за посредување и примање награда за договарање на средби меѓу Бојан Јовановски и бизнисменот Орце Камчев и беше осуден на казна затвор од три години.
Случајот „Рекет“ против Бојан Јовановски и Катица Јанева сè уште трае и се наоѓа во доказна постапка.
