Фронтлајн по вознемирувачкиот настан кој се случи во Виница, пред 3 дена, кога во време на полициски час беа отруени десетици улични и домашни животни, побара одговор како ќе се реши случајот од градоначалникот на Општина Виница, Ивица Димитров, и од Здружението за заштита на правата на животните Анима Мунди. До моментот на објавување на претходната вест на нашиот портал, Анима Мунди не одговори на нашите прашања.
„Вчера сабајле околу 8 часот бев запознаен од социјалните мрежи дека на улица “Димитар Герасимовски-Дидо” има за жал починати 4 кучиња. Веднаш по ова го информирав комуналниот инспектор задолжен за кучињата скитници, меѓутоа тој ме информираше дека дел од овие кучиња се скитници меѓутоа дел од овие кучиња се и домашни миленици. Значи се работи најверојатно за труење на овие кучиња, за да потоа се јават уште 3 кучиња исто така починати, се јавив до полициската станица и потоа случајот го пријавив во полициската станица. За ова е информиран и јавниот обвинител. Очекуваме поконкретни мерки да даде МВР бидејќи не се работи само за кучиња скитници туку и за оние со сопственици кои го имаат пријавено овој случај“, објасни градоначалникот Димитров во изјава за Фронтлајн.
Иако со задоцнување, Анима Мунди денеска излезе со соопштение, односно директно обраќање до министерот за внатрешни работи, Наќе Чулев, каде изнесуваат тврдење дека имаат докази за повеќе случаи од ваков вид кои се случуваат во повеќе градови низ Републиката, и дека сите случаи се пријавени во полиција, но досега немаат добиено никаков одговор.
“Масовно труење на животните во Виница, поточно цели улици со мртви тела од убиени кучиња е слика која ги затекна граѓаните на 22.04., наутро кога завршил полицискиот час. Нема да навлегуваме сега во нашите убедувања дека е просто неверојатно полицијата да не види, не знае ништо за случаи на насилство, кои се случувале буквално среде улица или среде бел ден, сега кога полициските патроли се распоредени на речиси секој агол; туку бараме веднаш да се пристапи кон истрага и да се најдат и казнат сторителите. Настрана од споменатите труења, сведоци сме на бројни други случаи на насилство врз животните. На располагање ги ставаме овие податоци / докази за мачење и изживување врз животни и бараме итно најстрого да се казнат сторителите кои, и во периодот на вонредна состојба „слободното време“ го користат за измачување на животни, кои благодарение на хумани граѓани и здруженија биле пријавени, но никаков исход нема“, велат од здружението, наведувајќи случаи во Куманово, Пехчево, Скопје, предупредувајќи дека нема да престанат јавно преку медиумите да го потсетуваат МВР за ингеренциите на полицијата.
И.Ежова
