Во текот на изминатото деноноќие на социјалните мрежи се појавија вознемирувачки фотографии на кои се гледаат десетици отруени кучиња и мачки на улиците во Виница. Овој настан се случил во текот на вчерашниот ден за време на полицискиот час. Градоначалникот на Oпштина Виница, Ивица Димитров даде изјава за Фронтлајн во врска со овој инцидент.
Во врска со настанот кој се случил вчера на улиците во Виница, дали може да ни кажете какви мерки преземавте во врска со тој настан, дали се работи на расчистување на случајот и пронаоѓање на сторителите?
Вчера сабајле околу 8 часот бев запознаен од социјалните мрежи дека на улица “Димитар Герасимовски-Дидо” има за жал починати 4 кучиња. Веднаш по ова го информирав комуналниот инспектор задолжен за кучињата скитници, меѓутоа тој ме информираше дека дел од овие кучиња се скитници меѓутоа дел од овие кучиња се и домашни миленици. Значи се работи најверојатно за труење на овие кучиња, за да потоа се јават уште 3 кучиња исто така починати, се јавив до полициската станица и потоа случајот го пријавив во полициската станица. За ова е информиран и јавниот обвинител. Очекуваме поконкретни мерки да даде МВР бидејќи не се работи само за кучиња скитници туку и за оние со сопственици кои го имаат пријавено овој случај. 
Дали планирате, на пример, сега да ги зголемите мерките за безбедност за време на полицискиот час, со цел да се спречи повторно случување на ваков немил настан?
Ова најверојатно е фрлена отруена храна во дел од кантите или контејнерите, и кучињата најверојатно таму се имаат заразено. Доколку дел од граѓаните ни пријават, ние ќе знаеме кој е сторителот, меѓутоа конкретни мерки не можеме, бидејќи тоа може да се случи на секоја наша улица. Наша надлежност е овој случај да го пријавиме до комуналните инспектори и до Агенцијата за храна и ветеринарство, како и до МВР за да ја испитаат целата ситуација. Се надеваме дека што е можно побргу сторителот ќе биде откриен и нормално да следуваат соодветни пријави за овој сторител.
Дали Вие и како градоначалник и како Општина имате план или решение за справување со овој проблем и згрижување на уличните животни?
Ние како Општина Виница имаме секоја година спроведување тендери, а тоа е за кучињата скитници, за заловување на кучињата скитници, овие кучиња се носат во лиценцирана фирма којашто ги прегледува, кучињата се вакцинираат и потоа се чипуваат и се враќаат на соодветното место од каде што се заловени. Моментално имаме склучено договор со ветеринарно-сточарскиот центар “Тодор Велков” од Куманово, и во текот на оваа година, од последниот тендер до ден денес се извршени 3 до 4 заловувања, некаде околу четириесеттина кучиња.
Како најголемо регистрирано Здружение за заштита на правата на животните кај нас, Фронтлајн.мк побара изјава и од Анима Мунди, но сè до овој момент од здружението не добивме одговор, како и било каков коментар за овој морбиден настан на нивните социјални мрежи.
Искра Ежова
монтажа: А. Мехмети
