По координативниот состанок со регионалниот изборен штаб во Куманово, техничкиот премиер Оливер Спасовски, заедно со ко-носителката на изборната листа во ИЕ2, Сања Лукаревска, дадоа изјава за медиумите.
Најважно за државата и граѓаните е да добијат инситуции со целосна функционалност, рече Спасовски.
Убедени сме дека по завршувањето на изборите нема да ни требаат вонредни состојби, најлошото е зад нас и здравствениот систем има план и е подготвен за сите можни сценарија. Избори треба да се одржат во првиот можен рок.
По сила на закон, изборите се 22 дена по завршувањето на вонредната состојба и не постои никаков друг правен механизам. Според пресметките, во овој случај изборите би биле на 5 јули. Било какво пролонгирање не е можно, додаде Спасовски во изјава за медиумите од Куманово.
Премиерот Спасовски посочи два фактори за порастот на заразени во последните неколку дена. Неодговорното работење и саботажите на техничкиот министер за внатрешни работи, Наќе Чулев се директна причина за зголемениот број инфицирани, а влијание има и непочитувањето на мерките кои беа олабавени со цел животот да продолжи, а економијата да се рестартира, вели Спасовски.
Втората носителка на листата во ИЕ2, Сања Лукаревска, ја нагласи потребата за избори со кои државата побрзо би излегла од комплицираната ситуација во која се наоѓа. Во моментот Домот на граѓаните – Собранието, не е во функција. На нашата економија и демократија, како и за јавното здравје потребно е активно Собрание, истакна Лукаревска.
Согласно законот, на 5 јули ќе се одржат изборите.
Ние немаме право да ги ставиме граѓаните во позиција да бираат дали ќе одат на одмор или ќе одлучуваат на избори, и затоа изборите треба да се случат веднаш, согласно законските рокови, истакна Лукаревска.
Во ниту еден случај не смее да биде нарушено правото на глас на секој граѓанин, но не смее да биде ни повредено правото на одмор. Затоа, избори мора да има на 5 јули. Институциите се целосно подготвени да организираат изборен процес со максимална заштита на сите учесници, вели Лукаревска.
Само по успешни избори зад нас, институциите ќе можат да ја спроведат новата македонска развојна економија. Функционалните институции директно ќе влијаат на зголемено вработување, поголема потрошувачка и заштита и креирање на нови работни места, посебно во секторите кои ќе ја употребат дигитализацијата, истакна носителката на листата во ИЕ2, Сања Лукаревска.
А. Н. Стојчевски
