Екипи на Единица за брзо распоредување интервенираа во ресторанот каде беше затекнат лидерот на ВМРО-ДПМНЕ, Христијан Мицкоски, пренесува А1он.
Тие интервенираат бидејќи се бришеле снимки од надзорни камери на кои се гледа дека угостителскиот објект работел, а внатре бил Мицкоски.
Додека инсистирале да направат увид, затекнале како политичар излегува од објектот.
Началникот на СВР Скопје, Ристо Ставревски, вечерва информираше дека по примената информација дека пазарната инспекција, која денеска беше спречена да изврши контрола на една кафеана на боемската улица, била и физички нападната, пристигнал пред објектот и по пристигнувањето од инспекторите добил информација дека немаат никаков проблем, ниту потреба од асистенција, објави Телма.
Тој истовремено повикал и полициски службеници и инспектори доколку имало напад на службено лице, да се постапува за загрозување на безбедноста.
Бидејќи немало таква потреба, Ставревски додаде дека продолжил со своите редовни активности но се вратил на истата локација откако добил информација дека таму се распоредени припадници на единицата за брзо распоредувања , кои се под команда на началникот за специјални полициски операции и по наредба од директорот за јавна безбедност.
Таму разговарал и со дополнителниот началник, кој е дел од организацијата на техничката влада, кој има подеднакви ингеренции во однос на постапувањето.
Од директорот за јавна безбедност добил информација дека има лица кои се во внатрешноста на кафеаната, спротивно од правилата, и дека вратата е заклучена.
Ставревски прецизираше дека распоредените сили сега чекаат да биде обезбедена судска наредба за да се влезе и провери веродостојноста на исказите, како и да се обезбедат видео снимките од видео надзорот.
Претходно вечерва, раководителката на Инспекциски надзор одделение Скопје, Мери Проја Продановска, одржа прес-конференција на Боемска улица во Скопје на која изјави дека инспекторите од Државен пазарен инспекторат, денеска околу 18:30 часот биле спречени да направат контрола во внатрешниот дел во угостителски објект, на оваа улица, со образложение дека угостителскиот објект е од затворен тип и нема гости внатре. Сепак на излегување, кога се вратиле по 2,5 часа виделе дека оттаму излегува лидер на политичка партија. Иако Продановска не спомена име, сепак претходно медиумите објавија дека станува збор за Христијан Мицкоски.
„По два и пол часа се вративме и повторно не нè пуштија да направиме надзор. Од угостителскиот објект излегол лидер на политичка партија“, рече Проја Продановска.
Таа најави дека против угостителскиот објект, односно економскиот оператор ќе биде поднесена кривична пријава по членовите 205 и 206 бидејќи се обавувала дејност во објектот и за спречување на инспекциски надзор.
