коментира: ЏАБИР ДЕРАЛА
Неверојатно! Љубчо Андоновски, поранешен шеф на УБК, а сега советник на Наќе Чулев, за ТВ 24 призна дека бил во друштво на шефот на ВМРО-ДПМНЕ, Мицкоски, во затворениот дел во „Винотека“ на 3 јуни. Наговата оизјава звучеше како ехо на изговорите на Мицкоски. Ако треба, ќе ја плател и казната, ако направил прекршок. Освен тоа, тој „ладно“ кажа и дека не можел да ги следи сите мерки, се менувале „во 5 до 12“, значи – не ги знае мерките!
Се поставува прашањето, како може советник на министер за внатрешни работи, поранешен шеф на УБК, човек што заработува околу 50.000 денари месечно, да не е информиран за мерките за заштита од коронавирусот.
Просто е неверојатна изјавата на човек што е на одговорна функција во безбедносниот систем, советник на министерот, солидно платен од парите на граѓанките и граѓаните, да признае дека не бил информиран за мерките за кои токму неговото министерство е обврзано да се грижи да бидат спроведени. И да признае дека му биле многу брзи мерките, се менувале „во 5 до 12“.
Андоновски беше прв човек на злогласното УБК во времето на залезот на режимот на Груевски, кој дојде на местото на Сашо Мијалков кој си поднесе оставка во мај 2015 година, веднаш по настаните во Диво Насеље. Своевремено, Андонов во интервју за Прес 24, на 26 април 2016 година, изјави дека тајната полиција е максимално будна и наведе дека имало индиции дека „во протестите се вклучени или дека протестите ги оркестрираат странски државјани“. Ама, мерките за заштита од коронавирусот не ги знае.
Во изјавата за ТВ 24, Андоновски се чуди и како сѐ уште не е ставен во притвор. Навистина, добро прашање, чиј одговор би требало да го знае добро и самиот, бидејќи е советник на министер за внатрешни работи, па нека е тоа и Наќе Чулев.
Колку што е познато, член 206 од Кривичниот законик не е донесен во „5 до 12“. Тој е со постар датум и гласи: „Тој што за време на епидемија на некоја опасна заразна болест не постапи според прописите или наредбите со кои се определуваат мерки за нејзиното сузбивање или спречување, ќе се казни со парична казна или со затвор до една година.“
Боемска работа…
