Фронтлајн во петокот, 12 јуни, објави дека докторот што ја породил пациентката, позитивна на КОВИД-19, исто така е позитивен. Подоцна, во текот на вечерта, беше објавена исправка:
„Се работи за сомнеж, односно за тест кој не е признаен и врз чија основа не може да се тврди дека некој е позитивен или не. Докторот, за кој денеска пишуваше Фронтлајн, ќе биде подложен на тестирање дури идната недела, а во меѓувреме е подложен на здравствените протоколи, односно е во самоизолација.“
Но тоа не е најголемиот проблем. Всушност, целата драма не се насочи кон дилемата дали и каков тест е во прашање. Намерно или не, се занемаруваат далеку поважни факти кои се однесуваат на грешките и немарноста на поединци во институциите.
Затоа, оваа тема ќе ја оставиме отворена, бидејќи во неа се кријат низа неодговорени прашања кои, се чини, некој се труди да ги замагли. Уште еднаш, не се работи ни за тоа дали нечиј тест е позитивен или не, дали тестот е официјален или не, туку како дошло до сите скандалозни настани поврзани со овој случај. Како дошло до, благо речено, чудните околности околу пациентката со КОВИД-19 која, од државната ГАК, со породилни болки, се појавила во приватната „Ремедика“, а притоа дел од документацијата исчезнува. Ќе побараме уште објаснувања, ќе откриеме уште факти.
Како, всушност, функционира системот? – тоа е главното прашање.
Фактите што ги прибравме во врска со овој случај се непобитни. Тоа што го дознавме, тоа и го напишавме. Тоа што беше изјавено, тоа го пренесовме. Ги почитуваме сите стандарди, а за тоа постојат и цврсти докази.
Тие што се прават (а не се) големи поборници на фактите и на професијата, допрва ќе црвенеат. Најлесно е да се биде зајадлив и саркастичен по социјалните мрежи, но кога ќе се стапне на таа патека, добро е образот да биде чист, а и долната облека.
Злорадоста на некои ликови што цел викенд се занимаваат со Фронтлајн, ќе им се лупне од суетата. Ќе си ја собираат после својата искршена суета по тротоарот, како ситни жолти парички.
На сите што се заразени од коронавирусот, им упатуваме силни и искрени желби за побрзо закрепнување. Чувајте се!
Некој сака да скрие нешто, но ние тоа нема да го дозволиме. Се работи за човечки животи!
Џабир Дерала
