– Со години забележуваме примери на непринципиелен однос на политичарите кон медиумите и новинарите, што нè исправило пред дилемата: дали најголем дел од политичарите знаат каква е улогата на новинарите и медиумските работници и кое е нивното значење за демократијата?, велат од трите здруженија.
Во следните десет дена јавно ќе поставуваат по едно прашање. Дел од прашањата ќе се однесуваат на ставовите на политичарите за реформите во медиумскиот сектор, гледиштата кон новинарството и идеите што ги имаат околу создавањето на услови за развој и слободно дејствување на професионалните новинари и медиумски работници, односно за точно, навремено и објективно известување.
– Очекуваме политичките чинители во изборите кои се сериозни да дадат искрени одговори кои понатаму ќе можат и да ги спроведат, а со цел подобрување на слободата на изразување и независноста на медиумите во нашата земја. Во наредните девет дена секојдневно и јавно ќе поставуваме по едно прашање со цел подигање на свеста за тоа што значи новинарството во едно демократско општество.
Новинарството е јавно добро и заслужува да добие таков третман, бидејќи нема демократска држава без професионално новинарство и добро информирани граѓани, истакнуваат од здруженијата.
Прашање кое го упатуваат до политичарите е да кажат што за нив претставува новинарството, како планираат да го поддржат професионалното новинарство на долг рок, што ќе направат за подобрување на независноста на финансирањето на МРТВ, за подобрување на безбедноста на новинарите, за поттикнување на колективното преговарање во медиумите…
