Бирото за јавни набавки (БЈН) одговорило негативно на барањето на Државната изборна комисија (ДИК) да набави софтвер за веб сајтот со преговори без објавување оглас, но и покрај тоа ДИК ја спровело набавката на тој начин, објави Сакам да кажам.
На 1 јуни 2020 година Државната изборна комисија испратила барање до Бирото за јавни набавки за спроведување постапка за преговарање без објавување оглас за Набавка на нови и надградба на постојни софтверски решенија во ДИК со образложение: „доколку поради крајна итност, предизвикана како резултат на настани кои договорниот орган не можел да ги предвиди, роковите за другите постапки не може да се применат“.
БЈН на 10 јуни одговара дека не се исполнети условите, а ДИК го прима решението на 16 јуни.
Два дена (18.6) откако го добиле негативното мислење од Бирото за јавни набавки, Државната изборна комисија донела одлука за јавна набавка со спроведување постапка за преговарање без објавување оглас. Утредента (19.6) биле поканети две компании, „Дуна“ и „АјВоут“, кои во рок од еден ден (20.6) ги доставиле понудите. На 22 јуни, ДИК ја избира понудата на „Дуна“ во износ од 899.999,00 денари како најповолна. На 29 јуни е потпишан договорот со „Дуна“. „АјВоут“ поднесува жалба на 22 јуни, која што е одбиена на 8 јули како неоснована. На 9 јули, договорот е доставен до Бирото за јавни набавки. Изборите се одржаа на 15 јули.
На вчерашната прес-конференција, на која што претседателот Оливер Деркоски ги прочита конечните неофицијални резултати од изборите, тој кажа дека го набавиле софтверот да се убрза процесот, и веднаш потоа се извини за доцнењето со резултатите. Тој тврди дека завчеравечер по затворањето на избирачките места биле цел на хакерски напад и поради тоа паднал сајтот, кој веќе трет ден не можат да го оспособат. На новинарско прашање зошто го пријавиле наводниот хакерски напад во МВР дури утредента, Деркоски одговори дека имале многу работа и немале време да се занимаваат со тоа.
Претходно во февруари, ДИК распиша тендер за набавка на софтверот, на кој како најповолен понудувач беше избрана „Дуна“, но тендерот беше поништен по жалбата на „АјВоут“.
Веб страницата на ДИК уште не работи.
Извор: Сакам да кажам
