Прилепските училишта ги подготвуваат ставовите, според условите, како да се одвива наставата од први октомври и колку се подготвени. Ставовите ќе бидат испратени до Министерството за образование до 10 септември. Преку 80 насто од учениците и родителите во 10-те основни и во петте средни прилепски училишта се за настава со физичко присуство, покажуваат анкетите и анализите за почетокот на учебната година. Засега се знае само дека од преку 10 300 основци и средношколци, 2 300 од прво до трето и средношколците со практична настава, ќе учат со физичко присуство.
Според Каролина Николоска, советник за образование во локалната самопуправа, има услови и според пртоколите да се одвива настава со физичко присуство.
-Досега, преку 80 насто од родителите сакаат и учениците од другите одделенија да имаат настава со физичко присуство. Тие барања ќе ги доставиме до министерството за образование. Овие барања се издржани зашто училиштата ги исполнуваат условите и со добра организација, според планот и протоколите, се вложуваат максимални напори да може да се изведува настава и со физичко присуство. Но се зависи од одлуката на Комисијата и на Министерството за образование. Во училиштата се оди на тоа учениците да бидат поделени во две смени. Со добра организација може да има настава со физичко присуство, вели Николоска.
Сите училишта ги анкетираа родителите и учениците и секое училиште има аргументирано барање. Веле Ѓорѓиојоски, директор на прилепското основно училиште „Гоце Делчев“ со околу 730 ученици, го пренесува ставот- освен учениците од прво до трето, настава со физичко присуство да имаат и шестоодделенците.
– Анкетата на родителите и на учениците е при крај. 90 насто од родителите се изјаснија за физичко присуство на наставата. Училиштето ќе биде подготвено да ја изведува наставата со физичко присуство за учениците од прво до трето и правиме напори за учениците од 6 одделение да имаат настава со физичко присуство, зашто тоа им е прв контаакт со наставниците по нова програма. Друите ученици, од 4,5, 7,8 и 9-то да имаат настава од далечина. Работиме паралелно со двата случаи на настава, паралелно го уредуваме училиштетото. Ќе чекаме како ќе ни одобрат за изведувањето на наставата. Инаку, од прво до трето одделение се 314 ученици, а 90-ина во шестто одделение. Во подрачното училиште во прилепското село Радобил ќе има настава со физичко присуство зашто таму се мал број ученици. Се подготвуваме за „он-лајн“ наставата и чекаме на Министерството за образование. Екипа од 7 наставници се на обука за он-лајн настават, објаснува Ѓорѓијоски.
-Како Гимназија сме на став да ни се дозволи учениците од прва година да имаат настава со физичко присуство. За таа цел направивме анкета помеѓу учениците и родителите. Резултатите се сумираат, но првичните покажуваат дека преку 85 насто од учениците и родителите се за настава со присуство. Подготвуваме план кој треба да помине на Наставнички совет, на Советот на родители и на Училишен одбор. На 9 септември ќе го доставиме до прилепската локална самоуправа, а оттаму до Министерството за образование. Правиме сѐ да бидеме технички подготвени, да може да ги почитуваме сите барања од протоколот за да може со учениците од прва година да изведуваме настава со присуство. Планираме тоа да трае еден месец, а потоа, во зависност од ситуацијата со Ковид-19, ќе се знае дали ќе продолжиме со физичко присуство или ќе се префрлиме на настава од далечина, како со учениците од втора, трета и од четврта година. Во однос на „он-лајн“ наставата, настојуваме да ги завршиме сите технички подготовки. Покрај тоа што се подготвува националната платформа која оваа недела дефинитивно треба да биде усвоена, ние зедовме и наша платформа, исто од Мајкрософт. За тоа, извршена е интерна обука на професорите. Има разговори за набавка на нови, посовремени компјутери, вели Настески.
Прилепските училишта ќе го чекаат конечниот став на Министерството за образование.
