коментира: ЈАНЕ ЃОРЃИОСКИ
Карл Нехамер, aвстрискиот министер за внатрешни работи денеска потврди дека напаѓачот кој синоќа го изврши терористичкиот напад во центарот на Виена потекнува од Македонија. Toj вели дека напаѓачот, кој беше убиен од полицијата, имал 20 години, имал македонско потекло и бил осуден за терористичко здружување. Министерот го кажа и името на убиениот терорист – Кујтим Фејзулаи, кој на 25 април минатата година бил осуден на 22 месеци затвор поради обид да отпатува во Сирија за да се приклучи на Исламската држава. Министерот Нехамер за агенцијата АПА изјави дека терористот имал австриско и македонско државјанство.
Главниот уредник на списанието „Фалтер“, Флоријан Кленк претходно објави дека напаѓачот е Албанец од Северна Македонија, роден и израснат во Виена, а неговите родители се незабележителни кога станува збор за исламизмот.
Напаѓачот е роден и израснат во Виена!
Сè друго се само изговори и барање виновник и одговорност на друго место. Не може за лице кое е родено, израснато и школувано во Австрија, таму и осудувано, лице кое отслужувало затворска казна во австриските затвори, па било помилувано, не може на такво лице само така да му се залепи етничка етикета и потекло на родителите и на некој начин со тоа да се измие вината на општеството и системот во кое тоа лице дејствувало сиот свој живот. Не оди тоа така другари.
Од друга страна се доби информација дека една од невините жртви е исто така со потекло Албанец од Македонија, а тоа некако бегло се премолчува.
Кај нас, за жал очекувано, не се чекаше многу и тргна лавината од гнасни коментари со говор на омраза врзани за етничкото потекло на убиецот. Актерите на таквите епизоди се добро познати на социјалните мрежи. Извесен Чоџукот на Јанаки го поистоветува терористот од Виена со настаните од 2001 година, а и промената на името:
„Под закана од вакви терористи и козоебачи ја дадовме државата под кирија 2001-ва. Под наводна закана од вакви терористи и козоебачи го плашеа народот дека мора да прифати промена на име и идетитет и да се откаже од малцинствата и историјата.“, твитна Чоџукот на Јанаки
На Твитер извесната „Марга“, оди и уште подалеку, па нападот го поврзува и со Зоран Заев и Мухамед Зеќири.
„Терористот од Виена Куртин С. 20 годишен албанец од Тетово кармички им покажа на Европите кој е Зоран Заев! Повели Европо ги имаш сите Терористи во Владата на РМ и терај све по ред у Хаг! Не заборавај Мухамед Зеќири да го собереш кој го држи ИСИС крилото во Сдсм.„, пишува извесната Марга на Твитер.
Но ова не тргна само од себе, тоа го предизвикуваат и кликачките наслови на некои од медиумите во Македонија:
„Терористот во Виена е Албанец и има тетовски корени?“ вели еден од насловите.
Во овој наслов нема лажна вест, но самата индикација дека се подвлекува етничкото потекло на напаѓачот, е многу осетлива и спорна, би рекол и поттикнувачка етикета. Тоа се истите оние наслови кои беа пракса и на новинските агенции во едно друго време: „Албанец од Тетово фатен со 30 грама…“, или реципроцитетно – „Македонец од Струмица, криумчарел мигранти…“, но за среќа ги има се поретко, или барем не се во агенциски вести повеќе такви насловите
И на крајот, сите ќе разберат дека еден од напаѓачите е по потекло Албанец од село Чолопек, Тетово, но малкумина ќе забележат дека една од невините жртви е и 21 годишниот Неџип Вренези, Албанец со потекло од Велешта, Струга, Македонија.
Според сведочењата на сведоци, како што пренесува порталот „News 33“, Вренези во моментот на нападот бил излезен од угостителски објект и се упатил кон продавница отспротива на локалот за да купи цигари, а кон него се пукало од позади грб.
Министерството за внатрешни работи на Македонија веќе добило барање од Австриската полиција за соработка поради терористичкиот напад. Австриската полиција преку Европол доставило барање за соработка и информации околу овој случај и од страна на Секторот за меѓународна полициска соработка при МВР веднаш се постапува, јавуваат од МВР.
Што треба да се подвлече од сето ова?
Во насловите од медиумите посочување на етничкото потекло од напаѓачот е сосема непотребно, погрешно и поттикнувачко, затоа што едноставно терористите и немаат етничко, туку само радикално загадено етичко потекло.
Сите права се задржани. Текстот е личен став на авторот
