Продавање/купување и активирањето на петарди на јавни места, на улица, во дворови, влезови на станбени згради и слично, претставува законски прекршок, за кој согласно члeн 31 од Законот за прекршоци против јавниот ред и мир е предвидена глоба од 200 до 500 евра во денарска противвредност, предупредуваат од СВР Тетово.
Оттаму потенцираат дека овој месец полицијата ги засили контролните и други активности, поврзани со навремено откривање и спречување продажба и употреба на петарди и други пиротехнички средства.
-Нивното набавување и дистрибуирање на пазарот во поголеми количини е спротивно на Кривичниот законик и за тоа дело е предвидена казна затвор од најмалку пет години. Секторот за внатрешни работи Тетово апелира подалеку од ваквите опасни „играчки”, кои неретко можат да предизвикаат и сериозни последици по здравјето, односно повреди на рацете, очите и другите делови од телото, а можат да повредат и други лица, потенцира портпаролот на СВР Тетово, Марјан Јосифоски.
Во пресрет на новогодишните празници забележителни се многу импровизирани тезги пред се околу зелениот пазар каде се продаваат разни пиротехнички средства најмногу петарди.
