Ретки се добрите пример на соработка и комункација меѓу граѓанските организации, кои работат на работничките права и институциите, оцени на денешната прва дебата на третата „Текстилијада“ во Штип, Кристина Ампева од Гласен Текстилец. Како добри примери во борбата за поголеми работнички права ја посочи соработката со трудовите инспектори од Куманово, Крива Паланка и Делчево, кои, како што, рече веднаш излегуваат на терен по секоја нивна претставка или доставена од работниците.
„Последнава година како што кажав имаме соработка со Државниот трудов инспекторат и неколку подрачни единици, исто така со Хелсиншкиот комитет за човекови права имаме веќе три годишен проект, испраќаме претставки заедно и ни одговараат на претставките. Меѓутоа дали се утврдуваат прекршоци во сите тие претставки, не“, рече Ампева.
Таа како добар пример во регионот го посочи Косово, каде што невладиниот сектор веќе работи заедно со трудовиот инспекторат. Елмир Ајдини од невладниот сектор во Косово вели дека нивната организација веќе заеднички работи со институциите и со инспекторат, а како пример го посочи нивното вклучување во носењето на новиот Закон за безбедност при работа.
На денешнава трибина на „Текстилијада“ беа посочени токму добрите примери меѓу невладините и институциите. Трудовата инспекторка од Крива Паланка, Моника, Митровска-Костовска која беше посочена дека си ја работи работат на терен вели дека претставки има во сите сектори, но секој ден пристигнуваат од текстилниот и кожарскиот сектор.
„Работниците најмногу се жалат и поднесуваат претставки поради прекувремена работа, мобинг, неисплатени плати, како и не користење на годишен одмор“, потенцира Митровска-Костовска.
Бранимир Јовановиќ модератор на „Текстилијада“-Штип забележа дека земјава е со наjлоши работнички права во Европа, причината е инертноста на институциите, желбата на сопствениците да го изиграат законот, но и немање на сила кај работниците за синдикално здружување. Но, решението го гледа во новиот Закон за работни односи, за кого ќе коментира кога ќе излезе и ќе биде ставен како Предлог, по што, како што рече, ако е добар ќе се пофали Владата, дека го исполнила она што го ветуваше во предизборната програма или ако не е добар ќе се критикува и ќе се донесе заклучок дека е како претходната.
Вечерва Текстилијада продолжува со промоција на стрипот „Супер Текстилка“, а утре на дебата ставовите за оваа и други теми ќе ги спротистават невладините, синдикатите, работодавците и министерката за труд и социјална политика.
Третата Текстлијада во Штип денеска почна со откривање на уметничка инсталација Игла во паркот во населбата 8 Ноември, каде што присуствуваше и градоначалникот на Општина Штип, Благој Бочварски. Тој забележа дека како општина ја подржуваат оваа манифестација посветена за работничките права, а токму како левичарска партија работат во изминатите години и на подобрување во делот на платите, како и носење на нови закони.
Денис Ампев од Гласен Текстилец вели дека Иглата има за цел да го претстави текстилот како гранка на која почива градот Штип, но исто така и гласот за потребата од подобри услови за вработените. Инсталацијата е креирана во соработка со Центарот за современа уметност и тимот на урбанистички уметнички акции и академскиот скулптор Андреј Митевски и Никола Писарев.
извор МИА
