Европската Унија повика на смирување на тензиите и воздржаност од сите актери, во заедничка изјава за Венецуела, поддржана од 26 од 27 земји членки. Единствена земја што не ја потпиша изјавата е Унгарија, чиј премиер Виктор Орбан важи за близок сојузник на Доналд Трамп, пренесува Euronews.
„Европската Унија ги повикува сите актери на смиреност и воздржаност со цел да се избегне ескалација и да се обезбеди мирно решавање на кризата“, се наведува во изјавата. ЕУ потсетува дека во сите околности мора да се почитуваат принципите на меѓународното право и Повелбата на Обединетите нации, при што посебна одговорност имаат и постојаните членки на Советот за безбедност на ОН.
Во документот повторно се нагласува ставот на ЕУ дека Николас Мадуро нема легитимитет на демократски избран претседател и дека Унијата подолго време се залага за мирна и демократска транзиција во Венецуела, под водство на самите Венецуелци и со целосно почитување на суверенитетот на државата.
ЕУ истакнува дека правото на венецуеланскиот народ сам да ја одреди својата иднина мора да биде почитувано, додавајќи дека борбата против транснационалниот организиран криминал и трговијата со дрога е заеднички приоритет, но дека тие предизвици мора да се решаваат преку одржлива меѓународна соработка и со почитување на територијалниот интегритет и суверенитетот на државите.
Во продолжение на изјавата, ЕУ наведува дека е во близок контакт со Соединетите Американски Држави, како и со регионалните и меѓународните партнери, со цел да се поддржи дијалог меѓу сите засегнати страни што би довел до демократско, инклузивно и мирно решение на кризата.
„Почитувањето на волјата на венецуеланскиот народ останува единствениот пат за обновување на демократијата и надминување на актуелната криза“, се наведува во соопштението, при што се потенцира дека во овој критичен момент сите актери мора целосно да ги почитуваат човековите права и меѓународното хуманитарно право.
Европската Унија повика и на безусловно ослободување на сите политички затвореници во Венецуела, додавајќи дека конзуларните служби на земјите членки тесно соработуваат за заштита на безбедноста на граѓаните на ЕУ, вклучително и оние кои, како што наведуваат, се незаконски притворени во земјата.
