Со натписи „И ние сме лекари“, „Еднаковост“ „ 0 + 0 + 0 = 0% покачувања, кофинансираните приватни специјализанти излегоа на протест пред Министерството за здравство со барања за повисока плата и поради тоа што нивните специјализации не се вклопуваат во Законот за здравствена заштита. Тие велат дека нивната плата изнесува колку просечна плата во државата, која е пониска од минималната плата на лекар од општа медицина со 360 кредити образование, бараат трансформација на нивниот однос од определено на неопределено време и зголемувањето на платите да ги опфати и нив.
„И покрај тоа што земаме пониска плата од нашите колеги кои немаат никаква обврска кон државата (ниту да работат во одредена институција, ниту да враќаат енормни суми на државата), плаќаме одреден дел од нашата партиципација за специјализација сами и годините што треба да ги одработиме за установата се исти како и државните специјализанти, финансиите што треба да ги вратиме се повисоки од тие на државните специјализанти кои се во однос 1:2 а ние кофинансираните се уште остануваме со однос 1:5 (5 пати повисоки од износот кој што е кофинансиран) доколку би се откажале од истата (беше направен обид за коригираање на одност 1:5 во 1:2 со отварање на ЗЗЗ по скратена постапка на 24.07.2019 за кофинансираните специјализанти, но неуспешно и не се спроведува) Тоа е огромна празнина во законот и крајно нефер обврзувачки договор“, велат организаторите“, напишаа пред неколку дена организаторите на протестот.
Министерот за здравство, Венко Филипче, викендов изјави дека разговарал со кофинансираните специјализанти и рече дека ќе се најде решение за барањата.
„Во текот на изминатата недела имав состанок со кофинансираните специјализанти. Дозволете да ве потсетам дека Владата предводена од СДСМ е првата која одвои средства во 2018 година приватните специјализанти за прв пат да бидат платени за својот труд. Тие до тогаш работеа практично без пари. Кофинансираните специјализанти се една посебна група која што има направено посебни договори заради тоа што преку специјализацијата тие имаат направено и договор на определено работно време.Согласно Законот, кога ја завршуваат специјализацијата, нивниот работен однос се трансформира во работен однос на неопределено работно време“, рече Филипче.
И.Т.З.
