Режимот се чувствува загрозен.
Режимот чувствува дека народот се обединува.
Режимот режира пропаганда со цел да го разедини и разнебити народот.
Режимот живее само кога народот е поделен.
Ова не е порака на некоја опозициска партија, туку дел од постот на навивачката група „Комити Скопје“ на нивниот Фејсбик профил. Па продолжуваат во постот со политичката реторика:
Режимот наредува – „слугите на режимот” спроведуваат!
Режимот апси – Режимот казнува селективно!
Да живее режимот или Смрт за Режимот!
Едукаторите по човекови права, национализам и говор на омраза, безмалку секогаш кога треба да покажат типичен пример нè упатуваат на Фејсбук страниците на навивачките групи. Дивеењата на навивачките групи за време и после натпреварите на безмалку сите екипни спортови од поголема спортска важност и на сите терени, стана вообичаена слика.
И одма тука ја имаме онаа првична реакција дека тоа е нормално и да го прифатиме како „општествен фолклор на навивачите“. Но, од друга страна одма се наметнува прашањето зошто ова е пример само кога се работи за организираните групи на навивачи што навиваат за домашните клубови. На социјалните мрежи гледаме извонредно добро организирани навивачки групи и Фејсбук страни од Македонија на навивачи кои се симпатизери на познати европски и светски клубови и каде строго се санкционира и никако не се дозволува постирање на говор на омраза или каква и да било верска, национална омраза на нивните страници и во коментарите.
Она што кај нас може да се забележи, што е многу симптоматично и се влече како неизлечив тумур по спортските трибини, а и надвор од нив, е мешањето на политиката, поконкретно – мешањето на политичките партии во навивачките групи и нивно инструментализирање.
Само два последни примери: „прославата“ на навивачката група „Шверцери“ во Македонскиот народен театар, а по неколку дена и реакцијата на „Комитите“ за приведувањето на неколку комити кои каменувале полициски службеници и нападнале 4 малолетни лица на плоштадот Македонија во Скопје, .
Во првиот случај го имаме Артан Груби потпретседателот на ДУИ и пратеник, како организатор и говорник на „прославата“ на „Шверцерите во МНТ.
За инцидентот во МНТ има осуда од Премиерот Заеви и барање на одговорност за дивеењето, но нема осуда од пратеникот Груби и министерите за култура и образование од редовите на ДУИ. Тие не гледаат инцидент во дивеењето и демолирањето на МНТ, ако при тоа немало говор на омраза.
(прилог на ТВ Телма за дивеењето на Шверцерите во МНТ)
Во вториот се препознава членот на „Комитите“ и нивни правен застапник Ванчо Шехтански, претседател на ТМРО, македонска политичка партија со десна ориентација, кој за каменувањето на полициските службеници и повредените малолетници на плоштадот Македонија во Скопје, во неговиот Фејсбук пост алудира на националната припадност на полициските службеници;
Како адвокат на навивачката група Комити, демантирам дека вчера имало било каков инцидент после натпреварот Вардар- Слога, при која наводно се приведени 4- ца навивачи на Вардар заради каменување полицајци???
Вистината е дека синоќа околу 17 часот беа приведени 13 наши навивачи, без никаков повод и причина. При моето одење во ПС Пролет и Центар, беше наведено од инспекторите кои случајно беа од една националност, дека наводно биле нападнати малолетни навивачи од друга навивачка група и националност?
Се сеќаваме и на поранешниот лидер на „Комити“ и хашки осуденик, а сега актуелен пратеник на ВМРО-ДПМНЕ Јохан Тарчуловски. Како се стигнува од водач на навивачка група до пратеник на голема политичка партија, е исто така легитимно прашање
Многу е симптоматично што ваквите инциденти речиси секогаш зачестуваат пред изборни циклуси и за време на предизборните капањи на политичките партии, напоредно со потикнувањата на немили настани на национална основа, секаде каде за тоа наидуваат на поволно тло за разгорување на ниските националистички страсти поткрепени со говор на омраза.
Остануваат прашањата дали има некаква шанса овие наши навивачки групи да се „очовечат“ да се оддалечат од национал-шовинстичките реторики, или – до кога навивачките групи од Македонија ќе се дозволуваат партиите да ги манипулираат и да ги користат како наменски мивки за расчистување на валкани партиски игри.
Бонус: На овој видео клип снимен во 1996 година во градинка во Македонија се гледа како деца во присуство на воспитувачка скандираат навивачка парола со говор на омраза
Ј. Ѓорѓиоски
