пишува: РИБАРО
Општ хаос се случувал вчера во раните утрински часови во Белата палата на вмровците. Мицкоски и потесното раководство, не можале да го најдат излезот.
Репортерот на АХА, од вмровски извори дознава дека најверојатно станувало збор за недоразбирање, за грешка во комуникацијата, но оставаат простор и за саботажа.
Имено, претходната вечер во Белата палата, претседателот Мицкоски имал состанок со најблиските соработници и пратениците. На состанокот се разгледувале најновите партиски анкети, на кои се гледал стрмоглав пад во рејтинзите на ДПМНЕ. И покрај сите оние силни блокади и опструкции што пратениците вмровци наменски ги пласираа за да се закочат сите позитивни најавени законски решенија, резултатите покажувале дека Мицковци здраво ќе го попапаат на предвремените парламентарни избори. Па имало дискусии, препирања, галама и какви ли не вмровски работи.
Во таква една напната и нервозна атмосфера, Мицкоски со повишен тон им наредил на пратениците:
МА БЛОКИРАЈТЕ СЀ! Ништо не смее да помине, ништо нема да ме поколеба и нема излегување додека…!, викал Мицкоски дури го држи гласот.
Хаус-мајсторот Екрем, кој во тој момент сменувал сијалички на еден од раскошните лустери во Белата палата (нели, оние лустери за кои Мицкоски се пофали дека веќе се отстранети), слушнал дека Мицко наредува да се блокира сè и презел конкретни мерки.
Екрем за неколку часови ги заѕидал сите влезни врати од Белата палата, потоа од надвор му се јавил на Мицко.
Шефе, наредбата е извршена, блокирано е сè, ги заѕидав сите влезови од палатата, му јавил Екрем на Мицкоски кој со своите соработници сè уште се наоѓал во Белата палата. Мицко со пцовки и колнења до трето колено го испратил Екрема, на што хаус-мајсторот Екрем „збунето“ ја спуштил слушалката и се оддалечил од местото на настанот.
Репортерот на АХА, јавува дека до раните утрински часови се слушале панични кукумјакања, а најразборит бил плачливиот глас на Влатко Ѓорчев. По неколку часа тешко заробеништво, со хилти и друга тешка механизација, специјална спасувачка екипа што дошле од германската амбасада ги ослободила излезите од Белата палата и вмровците биле успешно евакуирани.
Дали бистри Мицко прочитал нешто помеѓу редови од испратената помош од германската амбасада, или навистина станува збор за погрешна комуникација со хаус-мајсторот Екрем, останува да шпекулираме, но факт е дека вмровците после тоа почнаа понизно да ги откочуваат законските решенија предложени од владата.
Од денес Екрем работи како хаус-мајстор во Парламентот.
Го прашавме германскиот амбасадор, зошто толку ревносно се ангажирал да му најде ново работно место на Екрем?
За секој случај, може ќе ни се најде, изјави амбасадорот за АХА.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
