Никако да престанат политичките препукувања, дури и на грбот на учениците. Во овој предизборен период, дури и реновирање на тоалети во училишта се прикажуваат како руини во кои децата „немаат каде да извршат физиолошки потреби и да ги измијат рацете, бидејќи нема тоалети и нема вода!“.
Фронтлајн разобличува уште една лажна вест по пријава на граѓанка од Јегуновце. На повеќе интернет медиуми, во јавноста познати како блиски на најголемата опозициска партија, се појавија содржини во кои се „известува“ дека учениците од основното училиште во село Јегуновце, Тетовско, нема каде да измијат раце, во сезона на инфекции и грипови. Се работи за нешто сосема друго.
Имено, факт е дека тоалетите во училиштето „Александар Здравковски“, во моментов, се реновираат, а градежните зафати треба да бидат завршени најдоцна до вторник следната недела.
– Најдоцна до вторник, следната недела, тоалетите во основното училиште во Јегуновце, Тетовско, ќе бидат готови со реновирањето, и подготвени за употреба, вели за Фронтлајн директорката на училиштето, Даниела Живковска.
Таа додава дека едниот (од трите) тоалет е веќе во употреба, со тоа што очекуваат вториот да биде готов до недела, а со градежните работи да се заврши најдоцна до вторник.
Реновирањето на тоалетите започнало за време на зимскиот распуст, затоа што биле веќе неупотребливи, но се очекува комплетно подновените тоалети да бидат во употреба од следната недела.
Во училиштето „Александар Здравковски“ учат вкупно 170 ученици во две смени.
Градоначалникот Дарко Блажевски, за Фронтлајн вели дека тоалетите биле руинирани, иако училиштето било реновирано во 2008 година. Појаснува дека дури и советниците од ВМРО-ДПМНЕ во општината гласале за реновирање, а откако завршил тендерот, веднаш се почнало со градежните работи.
Фотографиите што ги објавил самиот градоначалник, со цел да се прикаже дека тоалетите се „руина“, дел од медиумите со злонамерна селекција ги искористуваат за да прикажат нешто сосема друго. Со цел да се информира јавноста објективно, Фронтлајн ги објавува сите фотографии за состојбата на овие простории во училиштето пред, за време и по реновирањето.
Значи, се работи за реновирање на санитарни чворови кои никако не би требало, со злонамерна селекција, да бидат алатка за уште една партиско-пропагандна активност. И оваа лажна вест може да послужи како илустрација за злоупотребите во медиумската и политичката сфера кои се ставени во функција на валкана изборна кампања.
Б. Богдановска
