Државната комисија за спречување на корупција и судир на интереси денеска имаше интервју со министреката за правда Рената Дескоска за нејзината номинација за членка на Венецијанската комисија. Иако, номинацијата е прифатена од Венецијанската комисија, ДКСК, сепак отвори предмет и ќе излезе со свој став за спорното прашање дали Дескоска истовремено може да биде и министерка и членка во Комисијата.
„ДКСК отвори предмет за овој случај, за да се разграничат сите прашања поврзани со овој случај. Нас нè интересира следното: кои се правилата за членување во Венецијанската комисија, дали таа си има свои правила, критериуми, од друга страна каква е постапката за номинација од страна на нашата држава и дали сите овие постапки имаат некакви пречки со нашиот закон: дали тоа се смета за јавна функција или не, кај нас не смее да постои акумулација на јавни функции. Ние веќе имавме разговор, односно интервју со министерката Дескоска. Понатаму испративме писмо до Владата во кое побаравме да ни ги достави податоците околу нејзината номинација, но исто така ќе ги провериме и самите правила дефинирани во Деловникот и во Статутот на Венецијанската комисија и што тие предвидуваат. Колку што знам и сум информирана секој претставник кога станува збор за дискусии од неговата земја не смее да учествува во расправата во Венецијанската комисија ниту пак да одлучува. Тоа се правилата кои што ги има воспоставено. Но, како и да е, ние го почнавме случајот, да ги собереме овие процедурални прашања и понатаму ќе си излеземе со наш став“, изјави претседателката на ДКСК, Билјана Ивановска за ЦИВИЛ Медиа.
Биљана Јордановска/ЦИВИЛ Медиа