По завршувањето на јавната дебата во парламентот за Законот за јавно обвинителство, а посебно од јавните настапи на партиските претставници со коментари за јавната расправа, се откри вистината како, до ден денеска, ВМРО-ДПМНЕ не попушта за законот. Одамна нема сомнеж дека предметите на СЈО се трн во око на Христијан Мицковски. Дури веќе држи и тезата дека тој ќе остане на претседателската функција само ако испорача ослободување на сите криминалци на партијата.
Преговорите за законот траат една година проследени со низа конфронтации и јавни препукувања. Летото опозицијата имала шанса да го прифати предлогот таа да го предлага обвинителот против организиран криминал и корупција, но се покажало дека тоа е ирелевантно за партијата на Христијан Мицковски, односно дека многу поголем приоритет даваат на поништувањето на предметите на СЈО, отколку на важноста да се изгради независен обвинителски систем што ќе гарантира правда.
ВМРО-ДПМНЕ настапувале со серијал предлози околу законот. Во неколку наврати СДСМ оценувало дека предлозите се конструктивни и влијаат на подобрување на законот и затоа ги прифаќале, но секогаш кога се мислело дека е крај со предлозите и конечно преговарачите на ВМРО-ДМНЕ ги исцрпеле од дневен ред, се појавувале нови и нови предлози. На крајот, во СДСМ сфатиле дека стратегијата на ВМРО-ДПМНЕ е да помине септември, кога и ќе престане мандатот на специјалните обвинители за да добијат уште еден простор во обидот да ги згаснат досиејата против криминалците во нивните редови.
Што ги отежнува преговорите за донесување на Законот за Јавно обвинителство? Едноставно, не може да се преговара со партија во која актуелните функционери се обвинети од СЈО. Оние што се лично засегнати, а со тоа и самата партија, не може да се очекува дека ќе се залагаат за правда, независно обвинителство, силни обвинители и владеење на правото. Ако е така, тогаш тоа ќе им се удри од глава. Просто кажано, како пратениците на ВМРО-ДПМНЕ да гласаат закон, со тоа да овозможат создавање на професионална институција која потоа нив ќе ги гони, а може и ќе ги однесе во затвор. Тука лежи зајакот, како да се заштити сопствената кожа.
На јавната дебата беа изнесени низа критики и пофалби за законското решение. Подготвеноста на Министерството за правда да ги вметне предлозите и забелешките во текстот на законот се транспарентен обид да се натераат пратениците на ВМРО-ДПМНЕ да учествуваат на последната рунда од носење на законот. Ако навистина правниците во комисијата повеќе изнеле критики, како што тврди ВМРО-ДПМНЕ, тогаш ете им добра прилика да подготват амандмани со забелешките на експертите и да го подобрат законот.
Но не, тоа ништо нема да смени во поглед на предметите на СЈО, кои, и да не се опфатени со новиот Закон за јавно обвинителство, ќе може да се процесуираат според Законот за кривична постапка. Ако ВМРО-ДПМНЕ поднесе амандмани, а мнозинството пратеници ги прифати, тогаш тие ќе мора да гласаат за законот. Затоа ним им е подобро да игнорираат да опструираат и да ја дефокусираат дебатата за законот, само за да згасне криминалот во предметите на СЈО.
Ова е шах- мат позиција за Мицковски и за ВМРО-ДПМНЕ, во која самите се доведоа. Нејасно е како не сфаќаат дека нема да им помине филмот, или сфаќаат ама се прават лудаци. Повторно.
Преземањето е слободно и добредојдено.
