Генералниот секретар на СДСМ, Љупчо Николовски, ги повика сите правдољубиви граѓани денеска со почеток во 18 часот да се приклучат на Маршот „Чекориме за правда“, што ќе почне од пред Собрание, а ќе заврши пред комплексот судови.
– Нашата заложба за градење на силни, независни и професионални јавни обвинителства – успева. Собранието со потребното мнозинство пратеници го усвои Законот за јавно обвинителство. Ставивме уште еден темел на неселективната правда и на правосудство кое гарантира одговорност и казнивост за секој којшто го прекршил законот – порача Николовски.
Тој им честита на пратениците кои го поддржаа овој Закон и смета дека огромното мнозинство во Собранието покажа дека иднината на земјата е поважна од партиските тактики. Нема веќе простор за криминални структури и за политичари кои поддржуваат криминални интереси.
– Тие што се дрзнаа да го кочат напредокот на државата – изгубија! Извршителот Мицкоски и неговиот шеф Груевски се поразени од пратениците, од народот, од СДСМ и од сите политички и граѓански сили кои и мислат добро на сопствената земја. Правда ќе има, правдата доаѓа – порача Николовски.
– Затоа, ве повикувам денеска со почеток во 18 часот да се приклучите на Маршот „Чекориме за правда“.
Тргнуваме од Собранието – и завршуваме пред комплексот судови – таму ја упатуваме нашата порака. Следува прочистување на правосудството. Тоа имаме да порачаме и за тоа бараме поддршка, од вас од граѓаните! Ве повикувам сите праведољубиви граѓани, да ни се приклучите. Се гледаме во 18 часот пред Собранието, чекориме за правда!
