Илустрација за манипулативна содржина што е дел од пропагандата секако е еден текст објавен на веб страницата Нетпрес, за која во јавноста стана познато дека во 2018 година примила дел од милионските суми (во евра), црни пари, од Будимпешта. Се работи за лажна вест врз основа на манипулирање со одговор на претседателот на СДСМ, Зоран Заев, на прашањето на водителот на ТВ дуелот на Канал 5, емитуван на 28 февруари. Прашањето на водителот се однесуваше на тоа дали е можна широка коалиција меѓу СДСМ и ВМРО-ДПМНЕ, во услови на изедначен изборен резултат.
Нетпрес објави текст под наслов „Заев не верува во победа – Ќе побарал по изборите техничка Влада“ на 28 февруари, кој сѐ уште може да се види во твитовите на партиските ботови. Тоа е лажна вест.
„На прашањето дали по изборите размислува за широка коалиција помеѓу СДСМ и ВМРО-ДПМНЕ, Зоран Заев одговори дека токму тоа е неговиот план по изборите на 12 април. Очигледно е дека Заев не верува дека ќе победи на предвремените парламентарни избори па уште сега го подготвува теренот за техничка Влада во која ќе учествуваат сите парламентарни партии.“
Тоа не е точно. Со манипулација и кратење на одговорот на прашањето од водителот, Нетпрес се обидува да ги наведе своите читатели на заклучок сосема обратен на одговорот на Зоран Заев, во кој тој вели:
„Со ваквиот начин на водење на политики на господинот Мицковски, јас и мојата политичка партија не сме спремни да влеземе во заедничка коалиција на национално единство која што ќе седне заедно да работи…“
Со тоа, Заев го дисквалификуваше Мицкоски и неговата партија од таквата можност. Во својот одговор, Заев, секако, ја изрази и спремноста, откако ќе победи на изборите, да соработува со сите во парламентот за да се одработат поглавјата важни за македонската интеграција во ЕУ, но тоа не значи дека „заклучокот“ на Нетпрес е точен.
Заев, во продолжение на својот одговор, изјави:
„Спремен сум, и тоа како, сериозно да размислам, после победата да ги повикам сите да влеземе внатрe. Да ги повикам сите. Тоа е мој став личен, не сум го разговарал со органи и тела на партијата да влеземе и да одработиме како што треба низ поглавјата, да го скратиме процесот на преговори, да ја департизираме администрацијата, да ги вклучиме и експертите и сите капацитети на државата и да разговараме.“
Како гласеше одговорот, може да се види од 43-та минута од 4. дел од ТВ дуелот на Канал 5.
