коментира: ЈАНЕ ЃОРЃИОСКИ
Се сеќавате ли на покадувањето со темјан од возило во движење, кога неколку православни свештеници во повеќе градови низ Македонија се обидуваа да го попрскаат корона вирусот со света вода и му фрлаа анатеми?
Свештениците во таа прилика истакнаа – Покадивме секаде низ градот. Опфативме доста улици. Темјанот да покади секаде. Попрскавме со крстена вода. Секако дека веруваме дека тоа ќе помогне. Ако не веруваме, нема да го правиме, велеа свештениците.
И свештенството од црквата Света Троица тие денови имале слична мисија на покадување:
– Денеска во 15:30 часот моштите од црквата Света Троица со возило беа изнесени по улиците на нашата парохија до селото Велгошти и се вратија повторно во црквата Света Троица за да се помолиме со Божјите светии за заштита од несаканите вируси и зарази.
Тогаш на овие верски манифестации имаше различни реакции, различни толкувања во зависност од убедувањата. На некои им беше симпатично, на други смешно, на трети разочарувачки, но имаше и луѓе кои искрено веруваа дека и тие верски обреди помагаат. И сè тоа, без разлика на некому му се допаѓало или не, со еден збор заокружено беше неопасно.
Ситуацијата со корона вирусот во нашата држава зема се поголем замав. Експертите велат, не сме го достигнале пикот. а се очекува тоа да биде кон крајот на месец април. Мерките на претпазливост, забрани за движења секакви рестрикции на групирања, даваат резултати за сето тоа да не ескалира како во други земји каде што излезе кризата од контрола. И покрај сето тоа „проклетијата“ секој ден зема данок во крв и не признава нит верска нит каква и да е друга различност. Темјанот, молитвите и светата вода, очигледно не си ја завршуваат работата.
Се ближи најголемиот христијански празник Велигден. Христијанските верници се припремаат да го слават Христовото воскресение. Повеќето верски храмови во светот се празни, но не се затворени.
Папата Франциско се моли сам пред празниот плоштад Свети Петар во Ватикан.
Incredible scene right now: Pope Francis praying in the middle of an empty St. Peter’s Square. pic.twitter.com/a7VJvO2VHZ
— Chico Harlan (@chicoharlan) March 27, 2020
Во една ваква ситуација, кога во овој момент има повеќе од 1.2 милиони заболени во цел свет и повеќе од 70.000 смртни случаи од Ковид-19, кога Дебар и Куманово се во „карантин“, кога светот е на пауза, кога ништо не функционира нормално како порано, тие – свештенството од црквата Света Троица, од охридско, преку Фејсбук пост ги повикуваат верниците да излезат за Велигден и масовно да ги посетат верските храмови:
„Браќа и сестри Православни Христијани!
На ден 18.04.2020 година во 23:30 часот да бидите сите во Црквите во вашата парохија и во 00:00 да го дочекаме Христовото Воскресение како што ни доликува со молитва и со причестна.
А не по балкони, и по дворови.
Црквата сеуште нема забрана за богослужба, така да сите богослужби остануваат како што се востановени во типикот, но доколку има промени во времето за богослужење нахнадно ќе известиме.
Мир и благослов од Христа Бога за вас и вашите ближни.“, пишува во постот на Сета Троица.
Велат, дојдете во храмовите, не седете по балкони и дворови.
Пристојноста и агностичката убеденост ми вели да се воздржам. Сè друго ми вели дека овие свештеници од Света Троица што повикуваат на масовно посетување на божјите храмови, во ова време-невреме кога сиот здраворазумен (па и божји) свет вика никакви собирања, заслужуваат да ги наредам со сиот прилепски вокабуларен арсенал со кој располагам.
Свештениците со овој повик всушност велат – дојдете да се испозаразите, дојдете сите заедно да закачите вирус, да умрете, да ги умрете вашите најблиски и сите околу вас: верници, неверници и тие помеѓу.
Надлежните мора да реагираат на вакво самоволие и директен повик од институција (па била и црковна), која може да предизвика штета по здравјето и животот на сите, а не само на присутните во храмот.
Јас, еве ќе се воздржам од други реакција.
Седи дома!
