Мерката за поддршка на работодавачите од приватниот сектор за 14.500 денари плата по вработен може да ја користат и управителите и сопственици на бизнисите вработени во истите. Ова го предвидуваат измените на Уредбата за поддршка на работодавачите од приватниот сектор погодени од здравствената економска криза, заради исплата на плати за април и мај, што ги донесе Владата вчера на седница.
Со Уредбата се прави измена и во делот на периoдот на обврската за задржување на бројот на вработени кои работодавачот треба да ги задржи два месеца по користење на мерката, односно до јули 2020 година. Претходно обврската беше да се задржи бројот на вработени заклучно со септември 2020 година.
„Флексибилноста, брзата реакција и слухот се клучни во менаџирањето на ваквата кризна состојба. На владина седница донесовме измена на Уредбата. Делуваме во насока на поддршка на стопанството и задржување на секое работно место“, напиша министерката за финансии Нина Ангеловска на својот фејсбук профил најавувајќи ги измените.
Како што појаснува измените се во насока на заштита на микро и мали фирми.
На оваа мерка, како што појаснуваат во соопштението од владината прес-служба по донесување на Уредбата, компаниите не може да аплицираат единствено за свои вработени за кои се ослободени од плаќање придонеси и персонален данок преку проектите „Македонија вработува” или доколку се одлучат да ја искористат мерката за субвенционирање на 50 отсто од придонесите во вонредна состојба, која е дел од првиот сет на мерки за справување со кризата.
Оваа мерка е дел од вториот пакет економски мерки на Владата за справување со кризата, а предвидува финансиска поддршка на работодавачот – барател за месеците април и мај 2020 година во износ од најмногу 14.500 денари месечно по работник, сразмено на остварените ефективни часови поминати на работа.
За да може работодавчот да ја користи оваа мерка треба да има намалување на приходите најмалаку 30 отсто, да не исплаќаат дивиденди на сопствениците, како и бонуси, годишни награди, награди за деловна успешност и слично на вработените и членовите на органите на управување и надзор на работодавачот, и просекот на делот на највисоките нето плати на 10 отсто од бројот на вработени да не надминува износ од 120.000 денари месечно по вработен.
Според Владата со мерката се поддржува ликвидноста на работодавачите од приватниот сектор, односно се намалуваат нивните трошоци за плати во функција на заштитата на работните места на работниците во услови на криза.
Финансиската поддршка не се однесува на оние вработени кои за месеците декември 2019 година, јануари и февруари 2020 година примиле нето плата повисока од 39.900 денари.
Работодавачите што ќе добијат финансиска поддршка од оваа мерка имаат обврска истиот број на вработени што го имале во моментот на аплицирање да го задржат заклучно со месец септември 2020 година.
Добиената финансиска поддршка нема да ја враќаат работодавачи што искажале загуба за 2020 година. За останатите враќањето е лимитирано до износ од 50 отсто од добивката пред оданочување зголемена за оданочивите расходи.
Работодавачите можат да поднесат барање за користење на оваа мерка преку системот е-даноци.
