Како влијае пандемијата врз животот на жените и девојките? Кои се нивните потреби, обврски, навики и каков е нивниот животен стил? Со какви проблеми и предизвици тие се соочуваат откако се рашири вирусната епидемија КОВИД-19? Ова се дел од прашањата кои Граѓанскиот концепт НЕКСУС ги одговара во истражувањето на овие состојби во периодот од 29 април до 1 мај. Во анкетата се опфатени вкупно 1790 жени и девојки.
Дури 71% од испитаничките одговориле дека се чувствуваат добро и немаат потреба од посета на доктор, но има и такви на кои посетата на доктор во дадениот период им била неопходна 9,7%. Стравот од посета на доктор во овој период спречила 9,3% од нив да ја реализираат оваа потреба.
Во однос на расположението 35,6% од испитаничките одговориле дека понекогаш се чувствуваат тажни и дефокусирани, но набргу наоѓаат начин како да се справат со оваа состојба. За разлика од нив 33,4% од испитаничките изјавиле дека уживаат во домашната изолација, а на 16,5% не многу често им се менува расположението и единствено нешто од што стравуваат е вирусот. Изолацијата за 7,2% од вкупниот број на испитанички претставува притисок, од причина што велат дека од нив се очекува да направат се во одреден рок, а притоа немаат никакво разбирање или поддршка од околината. Со сличен процент 7,6% од жените чувствуваат голем страв, анксиозност и психолошко растројство.
На прашањето дали е зголемено семејното насилство во домот за време на пандемијата, и особено за време на полицискиот час, исклучително висок процент односно 82,3% велат дека нема семејно насилство и дека ситуацијата ги зближила уште повеќе, 17% од испитаничките велат дека не многу често, но сепак се јавуваат кавги кои водат кон деструктивно однесување. Додека само 0,5% одговориле дека и претходно имале несогласувања но сега преминуваат во насилство. За 0,2% од вкупниот број на испитанички станало секојдневна појава во овој период.
Во однос на економската активност на жените и девојките и нивната работа, на прашањето дали им недостасува редовната работа 25,8% од испитаничките и во овие услови одат редовно на работа, додека пак 19,4% не се во работен однос. Работата им недостасува на 9,7%, а на 11% не им недостасува премногу. На 4,5% од испитаничките воопшто не им недостасува работата која и онака им претставувала голем стрес.
Истражувањето на НЕКСУС опфаќа и други аспекти како грижа и нега за себе, безбедност, физичка активност, исхрана и здравје.
