Во соопштение на официјалната страна на Социјалдемократскиот сојуз набројани се досегашните економски мерки, нивната ефикасност и најавениот трет сет кој ќе биде подолгорочен и ќе опфати повеќе цели.
Владата предводена од СДСМ, преку трите сета мерки со вкупна вредност од милијарда евра или 10% од БДП, ги ублажува последиците на кризата, предизвикана со пандемијата на корона вирусот.
Мерките имаат за цел да им помогнат на што повеќе граѓани, да сочуваат што повеќе работни места, да ги поддржат компаниите, но и да постават темели за трансформација на економијата.
Вкупната вредност на мерките од третиот сет мерките ќе изнесува околу 355 милиони евра и со него ќе бидат опфатени 730,000 корисници.
За мерката „14.500 денари по вработен“, се поднесени 23.861 барања, а до 14ти мај, се исплатени преку 14,3 милиони евра на 10.103 фирми.
Во целост е реализирана и првата бескаматна кредитна линија ,,Ковид1″, во чии рамки се одобрени 738 кредитни барања за компании со вкупно 6.524 вработени. Најголем дел – 77% од бескаматните кредити се за микро компании, 51% се од угостителтвото, а 43% од областа на транспортот.
Голем е интересот и за бескаматната кредитна линија Ковид2, за која аплицирањето заврши на 13-ти мај, до кога во Развојната банка пристигнаа 4.340 апликации.
Економскиот совет на СДСМ го финализира и третиот сет на мерки за директна поддршка за граѓаните и домаќинствата преку јакнење на јавната и приватната потрошувачка.
Се работи за долгорочен сет на мерки во кои се опфатени сите индустрии и граѓани погодени од кризата со корона вирусот а кои ќе овозможат модернизација, трансформација и конкурентност на македонската економија.
СДСМ како и досега, продолжува со одговорно и конструктивно делување за полесно надминување на последиците предизвикани од корона вирусот, се вели во соопштението на СДСМ.
